GTUમાં ગુજરાતીમાં માધ્યમમાં એન્જિનિયરિંગ કરવામાં ઉદાસિનતા

ગુજરાત ટેકનોલોજીકલ યુનિવર્સિટીએ 2022માં એન્જિનિયરિંગનો અભ્યાસ ગુજરાતી ભાષામાં શરૂ કર્યો છે. મહેસાણા ખાતે જીપેરી એન્જિનિયરિંગ કોલેજમાં દરેક શાખાની 34 બેઠક ગુજરાતી ભાષા માટે ફાળવી હતી. આ વર્ષે માત્ર 6 વિદ્યાર્થીઓએ પ્રવેશ માટે રસ દાખવ્યો છે.

ભવિષ્યના ડરે ગુજરાતી માધ્યમમાં એન્જિનિયરીંગનો અભ્યાસ કરવામાં વિદ્યાર્થીઓ ઉદાસિનતા દાખવી રહ્યા છે. મહત્વપૂર્ણ છે કે, વર્ષ 2022માં એકપણ વિદ્યાર્થીએ પ્રવેશ મેળવ્યો ન હતો. જ્યારે વર્ષ 2023માં માત્ર બે વિદ્યાર્થીઓએ પ્રવેશ મેળવ્યા બાદ પરત ખેંચી લીધો હતો. 

ગુજરાતી માધ્યમમાં એન્જિનિયરીંગના અભ્યાસ માટે 132 બેઠકો ફાળવી

ગુજરાત ટેક્નોલોજીકલ યુનિવર્સિટી(GTU)એ નવી શિક્ષણ નીતિના આધારે માતૃભાષામાં કોર્ષ શરૂ કર્યો છે. ગુજરાતી માધ્યમમાં એન્જિનિયરિંગના અભ્યાસ માટે મહેસાણાની જીપેરી એન્જિનિયરિંગ કોલેજની પસંદગી કરી છે.

જ્યાં દરેક બ્રાન્ચમાં 34 બેઠકો ગુજરાતી માધ્યમમાં એન્જિનિયરિંગ અભ્યાસ માટે ફાળવી છે. સિવિલ, મિકેનિકલ, કોમ્પ્યુટર અને ઇલેક્ટ્રિકલની 132 બેઠકો છે. ત્રણ વર્ષથી શરૂ કરેલો ગુજરાતી ભાષામાં એન્જિનિયરિંગનો અભ્યાસનો પ્રયોગ નિષ્ફળ ગયો છે. માતૃભાષામાં એન્જિનિયરિંગના અભ્યાસ માટે વિદ્યાર્થીઓને રસ નથી.

ગત વર્ષે 2 વિદ્યાર્થીઓએ પ્રવેશ મેળવ્યા બાદ પરત ખેંચ્યો
વર્ષ 2022માં ગુજરાતી માધ્યમમાં એન્જિનિયરીંગના અભ્યાસની શરૂઆત કરવામાં આવી ત્યારે એકપણ વિદ્યાર્થીએ પ્રવેશ મેળવ્યો ન હતો. ગત વર્ષે 2 વિદ્યાર્થીએ પ્રવેશ મેળવ્યા બાદ પરત ખેંચી લીધો હતો. આ વર્ષે ગુજરાતી માધ્યમમાં એન્જિનિયરિંગ કરવા વિદ્યાર્થીઓએ ઉદાસીનતા દાખવી છે.

ગુજરાતીમાં એન્જિનિયરિંગ માટે માત્ર 6 વિદ્યાર્થીઓએ રસ દાખવ્યો છે. મિકેનિકલ એન્જિનિયરીંગમાં 2 અને કોમ્પ્યુટર એન્જિનિયરીંગમાં 4 વિદ્યાર્થીઓએ પ્રવેશ મેળવ્યો છે.

ગુજરાતી માધ્યમમાં એન્જિનિયરીંગના પુસ્તકો પણ પ્રકાશિત કર્યા
ગુજરાત ટેક્નોલોજીકલ યુનિવર્સિટીએ એન્જિનિયરિંગના ગુજરાતી પુસ્તકો પણ પ્રકાશિત કર્યા છે. નેશનલ એજ્યુકેશન પોલીસી અંતર્ગત તબીબી શિક્ષણ અને એન્જિનિયરીંગમાં માતૃભાષામાં શિક્ષણની શરૂઆત કરી હતી. ભવિષ્યમાં અંગ્રેજી ભાષાની જરૂર પડવાના કારણે વિદ્યાર્થીઓ માતૃભાષામાં એન્જિનિયરીંગ કરતા સંકોચ અનુભવી રહ્યા હોવાનું સામે આવ્યું છે.

વિદેશી કંપનીઓમાં નોકરી કરવાની હોવાથી માતૃભાષામાં રસ નહી
GTUના એડમિશન કમિટીના ચેરમેને જણાવ્યું કે, વિદ્યાર્થીઓ માનતા હોય છે કે માટે ડીગ્રી કે ઇન્ડસ્ટ્રીઝમાં મીડિયમ ઓફ ઇન્સ્ટ્રક્શન ઇંગ્લિશમાં હોવાથી તેઓ વિદેશી કંપનીમાં જોબનો આગ્રહ રાખતા હોય છે. જેથી વિદ્યાર્થી પોતાની કારકિર્દી માટે ઇંગ્લિશ વિષયને વધારે પસંદ કરતા હોય છે.

ગુજરાતી માધ્યમમાં એન્જિનિયરીંગના અભ્યાસ માટે પ્રવેશ મેળવી લીધા બાદ  આગળ ડિગ્રી એન્જિનિયરીંગ કે ઉચ્ચ અભ્યાસ માટે અંગ્રેજી માધ્યમની જરૂર પડે છે. એન્જિનિયરીંગના અભ્યાસ પછી મોટાભાગે વિદેશી કંપનીઓ સાથે કામ કરવાનું હોય છે. તેમાં અંગ્રેજીનો વધારે ઉપયોગ થતો હોવાથી વિદ્યાર્થીઓ ગુજરાતીમાં એન્જિનિયરીંગ કરવા ઉદાસીનતા દાખવી રહ્યા છે.