સૌરાષ્ટ્ર અને દક્ષિણ ગુજરાત બાદ મધ્ય ગુજરાતમાં મુશળધાર વરસાદ

દક્ષિણ ગુજરાત અને સૌરાષ્ટ્ર બાદ હવે મેઘરાજા મધ્ય ગુજરાત ઉપર મહેરબાન થયા છે. આણંદ, વડોદરા અને છોટાઉદેપુર જિલ્લામાં આભ ફાટતાં જળબંબાકાર જેવી સ્થિતિ સર્જાઈ છે.

બોરસદમાં 14 ઈંચ વરસાદથી જનજીવન અસ્તવ્યસ્ત બન્યુ છે. જ્યારે છોટાઉદેપુરના નસવાડીમાં જળબંબાકાર જેવી સ્થિતિ જોવા મળી છે. અંકલેશ્વરમાં ભારે વરસાદથી ઘોડાપૂરમાં 4 ઘોડા તણાયા હતા. દેવભૂમિ દ્વારકા, બનાસકાંઠા, કચ્છ અને રાજકોટ જિલ્લામાં 8 લોકોના વીજળી પડવાથી અને ડૂબી જવાથી મોત થયા છે.

ભારે વરસાદની પરિસ્થિતિના કારણે રાજ્યમાં અત્યાર સુધી 4238 લોકોનું સ્થળાંતર કરીને 535 લોકોનું રેસ્ક્યુ કરાયુ છે.

રાહત કમિશનર આલોક પાંડેએ જણાવ્યુ કે, રાજ્યમાં પાંચ ઝોનમાં અત્યાર સુધી સરેરાશ 455 મીમી વરસાદ પડ્યો છે. સરેરાશ વરસાદની સરખામણીએ સિઝનનો 51 ટકા વરસાદ વરસ્યો છે. કચ્છમાં સૌથી વધુ 75 ટકા અને સૌરાષ્ટ્ર ઝોનમાં 73 ટકા વરસાદ વરસ્યો છે.

રાજ્યના 73 તાલુકામાં 500 મીમી કરતાં વધુ વરસાદ વરસી ચૂક્યો છે. સરદાર સરોવર ડેમ 55 ટકા જેટલો ભરાઈ ગયો છે. રાજ્યમાં ભારે વરસાદથી બુધવારે 8 મોત થયા છે. જ્યારે સિઝનમાં 61 લોકોના અને 323 પશુના મોત થયા છે. રાજ્યમાં અત્યાર સુધી 4238 લોકોનું સલામત સ્થળે સ્થળાંતર કરાયુ છે. જ્યારે 525 લોકોનું રેસ્ક્યૂ કરીને સલામત સ્થળે ખસેડાયા છે. 

સુરત બાદ વડોદરાની સ્થિતિ વણસી છે. વડોદરામાં 6 કલાકમાં સાડા ચાર ઈંચ વરસાદ વરસતાં જળબંબાકાર જેવી સ્થિતિ જોવા મળી રહી છે. તંત્રએ ઈમરજન્સી નંબર જાહેર કરી બહારના કર્મચારીઓને ઘરે પરત ફરવા અપીલ કરી છે.

અને શાળાઓમાં બે દિવસની રજા જાહેર કરવામાં આવી છે. સુરતમાં પાંચ ખાડી ઓવર ફ્લો થતાં શહેરમાં ખાડીપૂરનું સામ્રાજ્ય જોવા મળ્યું છે. પર્વત પાટિયા, પૂણા ગામ, લિંબાયત જેવા વિસ્તારો પાણીમાં ગરકાવ થયા છે. તંત્રએ જળસ્તરમાં હજુ વધારો થવાની ચેતવણી સાથે લોકોને સલામત સ્થળે ખસી જવા અપીલ કરી છે.

ગુજરાત ઉપર ત્રણ વરસાદી સિસ્ટમ :

ગુજરાત પર એક સાથે ત્રણ વરસાદી સિસ્ટમ સક્રિય થઈ છે. દક્ષિણ ગુજરાત અને સૌરાષ્ટ્રના કેટલાક જિલ્લાઓમાં રેડ એલર્ટ જાહેર કર્યુ છે. મધ્ય ગુજરાત અને સૌરાષ્ટ્રના કેટલાક જિલ્લાઓમાં ઓરેન્જ અને ઉત્તર ગુજરાતમાં યલો એલર્ટ જાહેર કર્યુ છે.

અમદાવાદ શહેરના વિવિધ વિસ્તારોમાં હળવાથી મધ્યમ ઝાપટાં પડવાની શક્યતા છે. હવામાન વિભાગે આગામી પાંચ દિવસ રાજ્યમાં ગાજવીજ સાથે વરસાદની શક્યતા વ્યક્ત કરી છે. 28 જુલાઈ સુધી માછીમારોને દરિયો ન ખેડવા સૂચના આપી છે. દરિયાકાંઠાના વિસ્તારોમાં 45 થી 55 કિલોમીટરની ઝડપે પવન ફૂંકાશે. .