અમદાવાદમાં સરકારી આવાસો તૈયાર છતાં લોકાર્પણ નહીં

તૈયાર આવાસો છતાં કર્મચારીઓ રાહમાં
અમદાવાદમાં સરકારી કર્મચારીઓ માટે કરોડો રૂપિયાના ખર્ચે નિર્માણ કરાયેલા આધુનિક આવાસો તૈયાર હોવા છતાં તેમના લોકાર્પણમાં વિલંબ થતાં કર્મચારીઓને ભારે મુશ્કેલીઓનો સામનો કરવો પડી રહ્યો છે. શાહીબાગ, રાણીપ અને એલ.ડી. કોલેજ નજીક આવેલા અનેક આવાસો લાંબા સમયથી ઉપયોગમાં આવ્યા વગર ખાલી પડ્યા છે. કર્મચારીઓ 'વિકસિત ભારત @2047'ના નિર્માણમાં પોતાનો અમૂલ્ય સહયોગ આપી રહ્યા છે. પરંતુ તેમને રહેઠાણ જેવી મૂળભૂત સુવિધા માટે સંઘર્ષ કરવો પડી રહ્યો છે

2022થી કરેલી અરજીઓ હજુ પણ પેન્ડિંગ
માર્ગ અને મકાન વિભાગ દ્વારા રાણીપ, શાહીબાગ, એલડી કોલેજની બાજુમાં સહિતના વિસ્તારોમાં સરકારી આવાસો લાંબા સમયથી તૈયાર થઈ ગયા છે. પરંતુ લોકાર્પણ નહી થઈ શકતાં કર્મચારીઓને રાહ જોવી પડી રહી છે. વર્ષ 2022 દરમિયાન સરકારી આવાસ માટે અરજી કરનારા ઘણા કર્મચારીઓ હજુ સુધી ફાળવણીની રાહ જોઈ રહ્યા છે. અનેક કર્મચારીઓ ત્રણથી ચાર વર્ષથી વેઇટિંગની યાદીમાં છે. જેના કારણે તેઓને ખાનગી ભાડાના મકાનોમાં રહેવાની ફરજ પડી રહી છે.

મોંઘા ભાડાના કારણે બજેટ પર અસર
અમદાવાદ જેવા મહાનગરમાં રહેઠાણનો ખર્ચ સતત વધી રહ્યો છે. આવાસ ન મળવાને કારણે સરકારી કર્મચારીઓને ઊંચા ભાડા ચૂકવવા પડી રહ્યા છે. જેના કારણે તેમના માસિક ખર્ચમાં વધારો થયો છે અને ઘરેલુ બજેટ પર વધારાનો બોજ આવી રહ્યો છે.

એક તરફ રાહ જોતા કર્મચારીઓ, બીજી તરફ ખાલી આવાસો
એક તરફ હજારો કર્મચારીઓ સરકારી ક્વાર્ટરની રાહ જોઈ રહ્યા છે. જ્યારે બીજી તરફ તૈયાર થયેલા અનેક આવાસો લોકાર્પણના અભાવે ખાલી પડ્યા છે. આ સ્થિતિને કારણે કર્મચારીઓમાં અસંતોષ અને નિરાશાની લાગણી વધી રહી છે. સરકારી ક્વાર્ટરોની મર્યાદિત ઉપલબ્ધતાને કારણે ઘણા કર્મચારીઓને આવાસ મેળવવા માટે ત્રણથી ચાર વર્ષ સુધી રાહ જોવી પડે છે.

સરકારના કર્મયોગીઓ માટે રહેઠાણ જરૂરી
રાજ્યના વિવિધ વિભાગોમાં ફરજ બજાવતા કર્મચારીઓ વિકાસલક્ષી યોજનાઓ અને વહીવટી કામગીરીમાં મહત્વની ભૂમિકા ભજવી રહ્યા છે. આવા કર્મયોગીઓને રહેઠાણ જેવી મૂળભૂત સુવિધા સમયસર ઉપલબ્ધ થાય તે જરૂરી હોવાનું કર્મચારીઓનું માનવું છે.

તાત્કાલિક ફાળવણીની માંગ
કર્મચારીઓ અને વિવિધ વર્ગોમાંથી એવી માંગ ઉઠી રહી છે કે, તૈયાર થયેલા સરકારી આવાસોનું વહેલી તકે લોકાર્પણ કરવામાં આવે અને પાત્ર કર્મચારીઓને તેની ફાળવણી કરવામાં આવે. આવું થવાથી કર્મચારીઓની આવાસ સંબંધિત સમસ્યાઓનો ઉકેલ આવશે અને તેઓ વધુ ઉત્સાહ સાથે પોતાની ફરજ નિભાવી શકશે.

કાર્યક્ષમતા પર પણ પડી શકે અસર
લાંબા સમયથી ચાલતા વિલંબના કારણે કર્મચારીઓમાં નિરાશા વધી રહી છે. નિષ્ણાતોના મતે, કર્મચારીઓની સુખાકારી અને સંતોષ તેમની કાર્યક્ષમતા સાથે સીધો સંબંધ ધરાવે છે. તેથી સરકાર દ્વારા આ મુદ્દે ઝડપથી નિર્ણય લેવો જરૂરી માનવામાં આવી રહ્યો છે.