કેન્દ્રીય કર્મચારીઓ અને પેન્શનધારકોને દિવાળીની ભેટ

કેન્દ્ર સરકારે દેશના લગભગ 1.5 કરોડ કેન્દ્રીય કર્મચારીઓ અને પેન્શનધારકોને દિવાળી પહેલા મોટી ખુશખબરી આપી છે. આજે યોજાયેલી કેબિનેટની બેઠકમાં મોંઘવારી ભથ્થા અને મોંઘવારી રાહતમાં વધારો કરવાની પ્રસ્તાવને મંજૂરી આપવામાં આવી છે. આ વધારો 1 જુલાઈથી પૂર્વવર્તી અસરથી અમલી બનશે, એટલે કે કર્મચારીઓને જુલાઈથી બાકી રહેલો વધારો પણ મળશે. કેન્દ્ર સરકાર સામાન્ય રીતે વર્ષમાં 2 વખત મોંઘવારી ભથ્થામાં વધારો કરે છે: પહેલો વધારો હોળી પહેલા જાન્યુઆરી-જૂન માટે અને બીજો વધારો દિવાળી પહેલા જુલાઈ-ડિસેમ્બરના સમયગાળા માટે જાહેર કરવામાં આવે છે.

મોંઘવારી ભથ્થા અને પગાર પર અસર

સરકારના આ નિર્ણય મુજબ, કેન્દ્રીય કર્મચારીઓના મોંઘવારી ભથ્થામાં આશરે 3 ટકાનો વધારો થવાની સંભાવના છે. આ વધારા સાથે હવે કુલ મોંઘવારી ભથ્થું તેમના બેઝિક પગારના 58 ટકા સુધી પહોંચી જશે. આ વર્ષે જાન્યુઆરી-જૂનના ગાળા માટે મોંઘવારી ભથ્થું 2 ટકા વધારવામાં આવ્યું હતું, જે છેલ્લા 6 વર્ષમાં સૌથી ઓછો વધારો હતો. 3 ટકાના આ વધારાની ગણતરી કરીએ તો, ધારો કે કોઈ સરકારી કર્મચારીનો બેઝિક પગાર 36,000 છે, તો તેના મોંઘવારી ભથ્થામાં દર મહિને 1080નો વધારો થશે. આ નાણાકીય લાભ પેન્શનધારકોને પણ મોંઘવારી રાહત સ્વરૂપે પ્રમાણસર મળશે.

આ પણ વાંચો: ગુજરાત સરકારના કર્મચારીઓનું મોંઘવારી ભથ્થું 7 ટકા વધ્યું

સાતમો અને આઠમો પગાર પંચ: આગામી અપેક્ષાઓ

હાલમાં સાતમો પગાર પંચ લાગુ છે, જેના માપદંડોના આધારે મોંઘવારી ભથ્થું વધારવામાં આવ્યું છે. સાતમા પગાર પંચનો 10 વર્ષનો સમયગાળો 31 ડિસેમ્બર, 2025ના રોજ પૂર્ણ થશે. કર્મચારીઓ અને પેન્શનધારકોને આશા છે કે, આગામી વર્ષના મધ્ય સુધીમાં આઠમું પગાર પંચ લાગુ થઈ શકે છે, જે ભવિષ્યમાં તેમના પગાર અને ભથ્થાંની સમીક્ષા કરીને મોટો વધારો લાવી શકે છે. કેન્દ્રીય કર્મચારીઓ માટે આ મોંઘવારી ભથ્થું અતિ મહત્વનું છે, કારણ કે તે મોંઘવારીના દર સામે જીવનધોરણ જાળવવામાં મદદરૂપ થાય છે. આ DA વધારો લાંબા સમયથી રાહ જોવાતી દિવાળી ભેટ છે, જે તેમના તહેવારોની ખુશીઓમાં વધારો કરશે.