Ahmedabd : ગુનેગારોના ગેરકાયદેસર બાંધકામો પર AMC ની બુલડોઝર કાર્યવાહી

અમદાવાદ શહેરમાં ગેરકાયદેસર બાંધકામો સામે અમદાવાદ મ્યુનિસિપલ કોર્પોરેશન (AMC) દ્વારા સખત કાર્યવાહી હાથ ધરવામાં આવી રહી છે. મંગળવારે સવારે શહેરના જુહાપુરા વિસ્તારમાં ગુનાહિત પ્રવૃત્તિઓમાં સંડોવાયેલા આરોપીઓના ગેરકાયદેસર બાંધકામોને નેસ્તનાબૂદ કરવા બુલડોઝર ફેરવવામાં આવ્યું. આ કાર્યવાહીમાં પોલીસના ચુસ્ત બંદોબસ્ત સાથે મ્યુનિસિપલ કોર્પોરેશનના દક્ષિણ પશ્ચિમ ઝોનના એસ્ટેટ વિભાગની ટીમે ભાગ લીધો.   જુહાપુરામાં નઝીર વોરાનું ગેરકાયદેસર બાંધકામ તોડવામાં આવ્યું
  જુહાપુરા વિસ્તારમાં આવેલા ઝુબેદા હાઉસ નામના ગેરકાયદેસર બાંધકામ પર આજે બુલડોઝર ફેરવવામાં આવ્યું. આ બાંધકામ આરોપી નઝીર વોરાનું હતું, જે વેજલપુર અને સરખેજ પોલીસ સ્ટેશનમાં 20થી વધુ ગુનાઓમાં સંડોવાયેલો છે. આ બંગલા પ્રકારનું બાંધકામ ગ્રાઉન્ડ ફ્લોર અને ફર્સ્ટ ફ્લોર સાથે 368 ચોરસ મીટરની જગ્યામાં ફેલાયેલું હતું. આ બાંધકામને ગેરકાયદેસર જાહેર કરીને AMCએ તેને તોડી પાડવાની કાર્યવાહી હાથ ધરી.   જુહાપુરાના સોનલ ચાર રસ્તા નજીક આવેલા અહેસાન પાર્કમાં સરફરઝ કીટલીના ગેરકાયદેસર બાંધકામ પર પણ આજે બુલડોઝર ફેરવવામાં આવ્યું. આ રહેણાંક પ્રકારનું બાંધકામ ગ્રાઉન્ડ ફ્લોર અને ફર્સ્ટ ફ્લોર સાથે 168 ચોરસ મીટરની જગ્યામાં ફેલાયેલું હતું. આ બાંધકામ પણ ગેરકાયદેસર હોવાને કારણે પોલીસ બંદોબસ્ત વચ્ચે તેને ડિમોલિશ કરવામાં આવ્યું.   AMCની કડક કાર્યવાહી
  અમદાવાદ મ્યુનિસિપલ કોર્પોરેશન દ્વારા શહેરમાં ગેરકાયદેસર બાંધકામો સામે સતત કાર્યવાહી કરવામાં આવી રહી છે. ખાસ કરીને ગુનાહિત પ્રવૃત્તિઓમાં સંડોવાયેલા આરોપીઓના બાંધકામોને નિશાન બનાવવામાં આવી રહ્યા છે. આ પ્રકારની કાર્યવાહીઓથી શહેરમાં ગેરકાયદેસર બાંધકામો પર અંકુશ લાવવાનો પ્રયાસ કરવામાં આવી રહ્યો છે.   આ કાર્યવાહી દરમિયાન સ્થાનિક રહીશોમાં પણ ચર્ચાનો વિષય બન્યો હતો, અને લોકોમાં ગેરકાયદેસર બાંધકામો સામેની આ કડક કાર્યવાહીનું સ્વાગત કરવામાં આવ્યું. AMCએ જણાવ્યું કે આવી કાર્યવાહીઓ ભવિષ્યમાં પણ ચાલુ રહેશે, જેથી શહેરના નિયમોનું પાલન થાય અને ગુનાહિત પ્રવૃત્તિઓને પ્રોત્સાહન ન મળે.