અમદાવાદમાં 4800 કિલો ડુપ્લીકેટ ઘીનો જથ્થો ઝડપાયો

ફૂડ વિભાગે ત્રણ સ્થળોએ કરી કાર્યવાહી

અમદાવાદ શહેરમાં શુદ્ધ ગાયના ઘીના નામે વેચાતા શંકાસ્પદ ઉત્પાદનો સામે અમદાવાદ મ્યુનિસિપલ કોર્પોરેશનના ફૂડ વિભાગે કાર્યવાહી હાથ ધરી છે. શહેરના ત્રણ અલગ-અલગ સ્થળોએ દરોડા પાડી કુલ 4,850 કિલોગ્રામ જેટલો શંકાસ્પદ ઘીનો જથ્થો વેચાણ માટે સ્થગિત કરવામાં આવ્યો છે. જપ્ત કરાયેલા માલની અંદાજિત કિંમત રૂ.31.81 લાખ હોવાનું સામે આવ્યું છે.

ઇન્દ્રપુરી વિસ્તારમાં સૌથી મોટો જથ્થો ઝડપાયો

AMCના દક્ષિણ ઝોનની ટીમે ઇન્દ્રપુરી વોર્ડ વિસ્તારમાં આવેલી એક જગ્યાએ તપાસ દરમિયાન "રિધમ કાઉ ઘી" અને "વચનામૃત કાઉ ઘી"ના સુપર સ્ટોકિસ્ટ તરીકે કાર્યરત વેપારી પાસેથી આશરે 3,250 કિલોગ્રામ ઘીનો જથ્થો શોધી કાઢ્યો હતો. આ જથ્થાની અંદાજિત કિંમત રૂ.21.31 લાખથી વધુ હોવાનું જાણવા મળ્યું છે.

 

#Ahmedabad

અમદાવાદના ઈન્દ્રપુરી વિસ્તારમાંથી શંકાસ્પદ ડુપ્લિકેટ ઘી ઝડપાયું,AMCના ફૂડ વિભાગે ત્રણ સ્થળેથી 4,850 કિલો શંકાસ્પદ ઘી જપ્ત કર્યુ.

રૂપિયા 31.81 લાખનો જથ્થો સીઝ કરી વધુ કાર્યવાહી હાથ ધરી
‘રિધમ કાઉ ઘી’ અને ‘વચનામૃત કાઉ ઘી’ના નામે ઘીનું વેચાણ થતું હતું

શંકાસ્પદ ઘીના… pic.twitter.com/4tIgchiIY0

— Benefit News 24 (@BenefitNews24) June 9, 2026

 

લેબોરેટરી પરીક્ષણ માટે નમૂનાઓ મોકલાયા

ફૂડ સેફ્ટી અધિકારીઓએ બંને બ્રાન્ડના ઘીના નમૂનાઓ એકત્ર કરીને પરીક્ષણ માટે લેબોરેટરીમાં મોકલી આપ્યા છે. સાથે જ સ્થળ પર રહેલો સમગ્ર જથ્થો વેચાણ માટે સીઝ કરવામાં આવ્યો હતો અને સંબંધિત એકમને તાત્કાલિક અસરથી બંધ કરાવવામાં આવ્યું હતું.

ઉત્પાદન સ્થળ સુધી પહોંચી તપાસ

પ્રાથમિક તપાસ દરમિયાન જાણવા મળ્યું કે બંને બ્રાન્ડના ઘીનું ઉત્પાદન દસ્ક્રોઈ તાલુકાના પાલડી-કાકંજ વિસ્તારમાં આવેલી સાર્થક ફૂડ પ્રોડક્ટ્સ કંપનીમાં કરવામાં આવે છે. સમગ્ર વિગતો રાજ્યના સંબંધિત વિભાગોને મોકલી આપવામાં આવી છે જેથી વધુ તપાસ અને જરૂરી કાર્યવાહી થઈ શકે.

અન્ય બે વિતરકો પાસેથી પણ જથ્થો મળ્યો

તપાસ દરમિયાન વટવા સ્થિત વીરકૃપા ટ્રેડિંગ અને દૂધેશ્વર વિસ્તારમાં આવેલી ત્રિશાલા એજન્સી અંગે માહિતી મળતા AMCની અલગ ટીમોએ બંને સ્થળોએ તપાસ હાથ ધરી હતી. અહીંથી આશરે 1,600 કિલોગ્રામ જેટલો શંકાસ્પદ ઘીનો જથ્થો મળી આવ્યો હતો, જેની કિંમત રૂ.10.49 લાખ જેટલી હોવાનું જાણવા મળ્યું છે.

કુલ રૂ.31.81 લાખનો માલ વેચાણ માટે સીઝ

ત્રણ અલગ-અલગ સ્થળોએ કરવામાં આવેલી કાર્યવાહીમાં કુલ 4,850 કિલોગ્રામ શંકાસ્પદ ગાયનું ઘી વેચાણ માટે સ્થગિત કરવામાં આવ્યું છે. સમગ્ર જથ્થાની કિંમત રૂ.31,81,273 જેટલી હોવાનું અનુમાન છે.

લેબ રિપોર્ટ બાદ થશે કાયદેસરની કાર્યવાહી

AMCના અધિકારીઓએ જણાવ્યું છે કે લેબોરેટરીના પરીક્ષણ અહેવાલ મળ્યા બાદ ખાદ્ય સુરક્ષા અને ધોરણ અધિનિયમ-2006 હેઠળ સંબંધિત વેપારીઓ અને જવાબદાર વ્યક્તિઓ સામે કાયદાકીય કાર્યવાહી હાથ ધરવામાં આવશે. AMC દ્વારા શહેરમાં ભેળસેળયુક્ત ખાદ્ય પદાર્થો સામે સતત અભિયાન ચાલુ રાખવામાં આવ્યું છે.