શિખર ધવન ફરી કરશે લગ્ન: જાણો કોણ છે સોફી શાઇન

ભારતીય ક્રિકેટ જગતના દિગ્ગજ ઓપનર શિખર ધવન, જેઓ ચાહકોમાં ગબ્બર તરીકે જાણીતા છે, તેઓ ફરી એકવાર લગ્ન કરવા જઈ રહ્યા છે. પ્રાપ્ત વિગતો અનુસાર, ધવન આયર્લેન્ડની સુંદર મોડલ સોફી શાઇન સાથે જીવનની નવી ઇનિંગ શરૂ કરવા તૈયાર છે. આ બંને લાંબા સમયથી એકબીજાના સંપર્કમાં હતા અને હવે તેમણે પોતાના સંબંધોને લગ્નનું સ્વરૂપ આપવાનો નિર્ણય કર્યો છે.

ફેબ્રુઆરીમાં દિલ્હીમાં જામશે લગ્નની શરણાઈ : 

અહેવાલો મુજબ, ફેબ્રુઆરી મહિનાના ત્રીજા અઠવાડિયામાં દિલ્હી-એનસીઆરમાં આ ભવ્ય લગ્ન સમારોહ યોજાશે. આ પ્રસંગે ક્રિકેટ જગતના જાણીતા ચહેરાઓ અને બોલિવૂડ કલાકારોની હાજરી જોવા મળી શકે છે. શિખર ધવન પોતે આ લગ્નના આયોજનમાં ખૂબ જ સક્રિય છે જેથી આ ખાસ પળ યાદગાર બની રહે.

મિત્રતા પ્રેમમાં કેવી રીતે બદલાઈ? 

સૂત્રોના જણાવ્યા અનુસાર શિખર અને સોફીની પ્રથમ મુલાકાત દુબઈમાં થઈ હતી. શરૂઆતમાં બંને વચ્ચેની સામાન્ય મિત્રતા ધીમે-ધીમે પ્રેમમાં પરિણમી હતી. તાજેતરમાં આઈસીસી ચેમ્પિયન્સ ટ્રોફી 2025 અને આઈપીએલ 2024 દરમિયાન સોફી સ્ટેડિયમમાં શિખરને પ્રોત્સાહન આપતી જોવા મળી હતી, જેના કારણે તેમના સંબંધોની ચર્ચા સોશિયલ મીડિયા પર શરૂ થઈ હતી.

કોણ છે સોફી શાઇન? 

સોફી શાઇન વ્યવસાયે પ્રોડક્ટ કન્સલ્ટન્ટ છે અને આયર્લેન્ડના લિમરિક ઇન્સ્ટિટ્યૂટ ઓફ ટેકનોલોજીમાંથી માર્કેટિંગ અને મેનેજમેન્ટની ડિગ્રી મેળવી છે. હાલમાં તે અબુ ધાબીમાં એક પ્રતિષ્ઠિત નાણાકીય સંસ્થામાં સેકન્ડ વાઇસ પ્રેસિડેન્ટના પદ પર છે. સોફી તેની સુંદરતા અને સાદગી માટે જાણીતી છે અને મોટાભાગે લાઈમલાઈટથી દૂર રહેવાનું પસંદ કરે છે.

ધવનની બીજી ઇનિંગ : 

ઉલ્લેખનીય છે કે આ શિખર ધવનના બીજા લગ્ન છે. અગાઉ 2012માં તેણે આયશા મુખર્જી સાથે લગ્ન કર્યા હતા અને તેમને જોરાવર નામનો પુત્ર છે. 2023માં કાયદેસર રીતે છૂટાછેડા થયા બાદ હવે ધવન સોફી સાથે એક નવી શરૂઆત કરવા જઈ રહ્યો છે.