કાંટા લગા ફેમ શેફાલી જરીવાલાનું 42 વર્ષે નિધન

અભિનેત્રી શેફાલી જરીવાલાનું 42 વર્ષની વયે દુઃખદ અવસાન થયું છે. સૂત્રો પાસેથી મળેલી માહિતી અનુસાર, મુંબઈના અંધેરી લોખંડવાલા વિસ્તારમાં રહેતી શેફાલી કાલે રાત્રે 11 વાગ્યાની આસપાસ ગંભીર રીતે બીમાર પડી હતી. છાતીમાં દુખાવો થતાં તેમના પતિ, અભિનેતા પરાગ ત્યાગી, તેમને તાત્કાલિક નજીકની હોસ્પિટલમાં લઈ ગયા હતા, જ્યાં ડોકટરોએ તેમને મૃત જાહેર કર્યા હતા. હોસ્પિટલના રિસેપ્શન સ્ટાફે પણ પુષ્ટિ કરી હતી કે શેફાલીને મૃત અવસ્થામાં લાવવામાં આવી હતી.

પ્રાથમિક અહેવાલો અનુસાર, શેફાલીનું મૃત્યુ હૃદયરોગના હુમલાને કારણે થયું છે. તેમના મૃતદેહને પોસ્ટમોર્ટમ માટે કૂપર હોસ્પિટલમાં મોકલવામાં આવ્યો છે.

'કાંટા લગા' ગીતથી પ્રસિદ્ધિ મેળવનાર શેફાલી જરીવાલાના આ અચાનક નિધનથી તેમના ચાહકોમાં શોકનું મોજુ ફરી વળ્યું છે. 42 વર્ષની ઉંમરે તેમનું અવસાન થતાં ચાહકોને આઘાત લાગ્યો છે. શેફાલી જરીવાલાએ પોતાની કારકિર્દીની શરૂઆતમાં "કાંટા લગા" ગીતથી ખૂબ જ લોકપ્રિયતા મેળવી હતી. જોકે, આ ગીત લાંબા સમય સુધી વિવાદમાં પણ રહ્યું હતું. અગાઉ પણ તેમના મૃત્યુના ખોટા સમાચાર ફેલાયા હતા. વર્ષો સુધી લાઇમલાઇટથી દૂર રહ્યા પછી, શેફાલી જરીવાલાએ બિગ બોસમાં પુનરાગમન કર્યું હતું અને તે ખૂબ જ સુંદર દેખાતી હતી. ત્યારબાદ શેફાલી સલમાન ખાન અને અક્ષય કુમાર સાથે 'મુજસે શાદી કરોગી' ફિલ્મમાં પણ જોવા મળી હતી.

શેફાલી જરીવાલાએ અભિનેતા પરાગ ત્યાગી સાથે લગ્ન કર્યા હતા અને બંને ખૂબ જ ખુશ હતા. તેમની તસવીરો અવારનવાર સોશિયલ મીડિયા પર જોવા મળતી હતી. શેફાલી જરીવાલાના ચાહકો તેમના આત્માની શાંતિ માટે સતત પ્રાર્થના કરી રહ્યા છે.