સરકે ચુનર તેરી વિવાદ: નોરા અને સંજય દત્તને નોટિસ

ફિલ્મ 'KD: ધ ડેવિલ' ના ગીત "સરકે ચુનર તેરી સરકે" એ રિલીઝ થતાની સાથે જ મોટો વિવાદ ઊભો કર્યો છે. રાષ્ટ્રીય મહિલા આયોગ (NCW) એ આ ગીતના કથિત અશ્લીલ અને વાંધાજનક શબ્દો પર સ્વયં સંજ્ઞાન લઈને અભિનેત્રી નોરા ફતેહી, અભિનેતા સંજય દત્ત તેમજ ફિલ્મના નિર્માતા-નિર્દેશકને નોટિસ પાઠવી છે. આ તમામ લોકોને ૨૪ માર્ચના રોજ આયોગ સમક્ષ હાજર થવા જણાવાયું છે. જો તેઓ નિર્ધારિત સમયે હાજર નહીં રહે તો તેમની વિરુદ્ધ કડક કાયદેસરની કાર્યવાહી કરવાની ચેતવણી પણ આપવામાં આવી છે.

સંસદમાં ઉઠ્યો મુદ્દો અને ડિજિટલ પ્લેટફોર્મ પરથી ગીત હટ્યું : 

આ વિવાદ માત્ર સોશિયલ મીડિયા પૂરતો મર્યાદિત નથી રહ્યો, પરંતુ સંસદમાં પણ તેની ગુંજ સંભળાઈ છે. સમાજવાદી પાર્ટીના સાંસદ આનંદ ભદૌરિયાએ આ ગીતના અશ્લીલ બોલ અંગે પ્રશ્ન ઉઠાવ્યો હતો. જેના જવાબમાં માહિતી અને પ્રસારણ મંત્રી અશ્વિની વૈષ્ણવે સ્પષ્ટ કર્યું હતું કે આ ગીત પર પહેલાથી જ પ્રતિબંધ લગાવી દેવામાં આવ્યો છે. સરકાર મહિલાઓ અને બાળકોના રક્ષણ માટે ડિજિટલ માધ્યમો પર કડક નિયંત્રણો લાવવા પ્રતિબદ્ધ હોવાનું પણ તેમણે જણાવ્યું હતું. હાલમાં આ ગીતને યુટ્યુબ સહિતના તમામ ડિજિટલ પ્લેટફોર્મ પરથી હટાવી દેવામાં આવ્યું છે.

નોરા ફતેહીનો બચાવ: મેકર્સ પર લગાવ્યા છેતરપિંડીના આરોપ

ચારેબાજુથી ઘેરાયેલી અભિનેત્રી નોરા ફતેહીએ સોશિયલ મીડિયા પર એક વીડિયો શેર કરીને પોતાની સ્પષ્ટતા રજૂ કરી છે. નોરાએ દાવો કર્યો છે કે તેણે આ ગીત ત્રણ વર્ષ પહેલા કન્નડ ભાષામાં શૂટ કર્યું હતું અને તે સમયે તેને ગીતના શબ્દોનું ભાષાંતર ખોટું સમજાવવામાં આવ્યું હતું. તેણે મેકર્સ પર ગંભીર આરોપ લગાવતા કહ્યું કે તેની પરવાનગી વિના ગીતને હિન્દીમાં ડબ કરવામાં આવ્યું છે, જેના લિરિક્સ અત્યંત વાંધાજનક છે. વધુમાં, નોરાએ જણાવ્યું કે લિરિકલ વીડિયોમાં તેની અને સંજય દત્તની એઆઈ (AI) જનરેટેડ તસવીરોનો પણ ખોટી રીતે ઉપયોગ કરવામાં આવ્યો છે.

શું છે સમગ્ર વિવાદ ? 

૩૦ એપ્રિલ ૨૦૨૬ ના રોજ રિલીઝ થનારી પાન ઈન્ડિયા ફિલ્મ 'KD: ધ ડેવિલ' નું આ ગીત ૧૪ માર્ચના રોજ રિલીઝ થયું હતું. ગીત રિલીઝ થતાની સાથે જ તેના ડબલ મિનિંગ શબ્દો અને વાંધાજનક ડાન્સ સ્ટેપ્સને કારણે વિવાદોમાં સપડાયું હતું. રાષ્ટ્રીય માનવાધિકાર આયોગે પણ આ મામલે સેન્સર બોર્ડ અને ગૂગલ ઈન્ડિયા પાસે જવાબ માંગ્યો છે. નોરા ફતેહીએ પોતાની પ્રતિષ્ઠા દાવ પર હોવાનું જણાવી મેકર્સ સામે આક્રોશ વ્યક્ત કર્યો છે અને કહ્યું છે કે આઉટસાઈડર કલાકારો પાસે ઈન્ડસ્ટ્રીમાં પાવર ઓછો હોવાને કારણે ઘણીવાર આવી સ્થિતિમાં ફસાવું પડે છે.