સામંથાએ રાજ નિડિમોરુ સાથે પ્રભુતામાં પગલાં પાડ્યા!

લાંબા સમયથી ચાલતી અટકળો અને રહસ્યો પર પડદો પાડીને અભિનેત્રી સામંથા રૂથ પ્રભુ અને ફિલ્મ નિર્માતા રાજ નિડિમોરુએ આખરે તેમના સંબંધોને સત્તાવાર જાહેર કર્યા છે. સોશિયલ મીડિયા પર તેમના લગ્નની વાત લીક થયા બાદ સામંથાએ સોમવારે બપોરે ઈન્સ્ટાગ્રામ પર તસવીરો શેર કરીને પોતાના લગ્નની જાહેરાત કરી દીધી હતી.

સામંથા અને રાજ નિડિમોરુએ તમિલનાડુના કોઈમ્બતુર સ્થિત ઈશા ફાઉન્ડેશન ખાતે એક સાદા અને સુમધુર સમારોહમાં લગ્ન કર્યા હતા.

સામંથાએ પોતાના ઇન્સ્ટાગ્રામ પર લગ્નની તસવીરો પોસ્ટ કરતા કેપ્શનમાં માત્ર '01-12-2025' લખીને સફેદ હાર્ટ ઇમોજી મૂક્યા હતા. પહેલી તસવીરમાં રાજ નિડિમોરુ લિંગા ભૈરવીની સામે સામંથાને રિંગ પહેરાવતા જોવા મળે છે. અન્ય એક તસવીરમાં સામંથા પોતાની રીંગનો મોટો ડાયમંડ બતાવતા રાજની પાસે ઉભી રહી પોઝ આપતી જોવા મળે છે.

તેમણે પરંપરાગત સમારોહની તસવીરો પણ શેર કરી છે, જેમાં તેઓ આરતી ઉતારતા અને દેવી-દેવતાની સામે બેસીને આશીર્વાદ લેતા દેખાય છે. લગ્ન દરમિયાન રાજે સફેદ કુર્તા સાથે બેજ રંગનો નહેરુ જેકેટ પહેર્યો હતો, જ્યારે સામંથાએ ક્લાસિક લાલ અને ગોલ્ડ સાડી પહેરી હતી અને વાળમાં સુંદર ફૂલો સજાવ્યા હતા.

સામંથા અને રાજ નિડિમોરુએ ક્યારેય જાહેરમાં તેમના સંબંધોની પુષ્ટિ કરી નહોતી, પરંતુ 2024ની શરૂઆતમાં જ તેમના ડેટિંગની અટકળો શરૂ થઈ ગઈ હતી. સામંથાનો નાગા ચૈતન્ય સાથે 2021માં જાહેર છૂટાછેડા થયા હતા, જ્યારે રાજ નિડિમોરુએ તેમની પ્રથમ પત્ની શ્યામલી ડે સાથેના સંબંધો અંગે ક્યારેય જાહેર ખુલાસો કર્યો નહોતો, જેના કારણે શરૂઆતમાં મૂંઝવણ હતી. જોકે, છેલ્લા કેટલાક સમયથી આ દંપતી સાર્વજનિક કાર્યક્રમોમાં સાથે જોવા મળી રહ્યું હતું.

આ સત્તાવાર જાહેરાત બાદ અનેક હસ્તીઓ અને ચાહકોએ નવદંપતીને શુભેચ્છા સંદેશ મોકલ્યા છે.