ફિલ્મ 'એનીમલ'ના ચર્ચિત ડિરેક્ટર સંદીપ રેડ્ડી વાંગાએ નવા વર્ષ 2026ની શરૂઆત ધમાકેદાર અંદાજમાં કરી છે. લાંબા સમયથી જેની રાહ જોવાઈ રહી હતી તે ફિલ્મ 'સ્પિરિટ' (Spirit)નું ફર્સ્ટ લુક પોસ્ટર&nbsp; રિલીઝ કરીને વાંગાએ સિનેપ્રેમીઓમાં ખુશી વધારી દીધી છે. તેલુગુ સુપરસ્ટાર પ્રભાસ આ ફિલ્મમાં એક અલગ જ રૌદ્ર અને ડાર્ક અવતારમાં જોવા મળી રહ્યો છે.
વાંગાએ રિલીઝ કરેલા પોસ્ટરમાં પ્રભાસ સાથે બોલિવૂડ અભિનેત્રી તૃપ્તિ ડિમરી તેના માટે સિગારેટ સળગાવતી પોઝમાં જોવા મળે છે. વાંગાએ આ પોસ્ટર સાથે લખ્યું, "ભારતીય સિનેમા... સાક્ષી બનો તમારા અજાનુબાહુના" આ ફિલ્મ 2026માં રિલીઝ થવાની છે અને તેના મેકર્સે તેને માત્ર ફિલ્મ નહીં પણ વર્ષ 2026 માટેની 'ચેતવણી' ગણાવી છે.
જોકે, આ પોસ્ટર રિલીઝ થતાની સાથે જ સોશિયલ મીડિયા પર ચર્ચાઓનું બજાર ગરમ થયું છે. અનેક નેટીઝન્સે પ્રભાસના આ લુકની સરખામણી વાંગાની છેલ્લી બ્લોકબસ્ટર ફિલ્મ 'એનિમલ'ના રણબીર કપૂર સાથે કરી છે. લોકોનું કહેવું છે કે પ્રભાસની હેરસ્ટાઇલ અને તેનો ઘાયલ અવતાર 'એનિમલ' ના રણબીરની યાદ અપાવે છે. કેટલાકે તો તેને 'બીજી એનિમલ' ગણાવી છે.
ફિલ્મ 'સ્પિરિટ'માં વિવેક ઓબેરોય પણ મહત્વની ભૂમિકામાં છે. અગાઉના ઓડિયો ટીઝર મુજબ, પ્રભાસ આ ફિલ્મમાં એક આઈપીએસ (IPS) ઓફિસરની ભૂમિકા ભજવી રહ્યો છે જે જેલના સળિયા પાછળ છે. 
ફિલ્મનું સંગીત અને તેનો વાયોલન્ટ અંદાજ ફરી એકવાર સંદીપ વાંગાની સિગ્નેચર સ્ટાઇલ દર્શાવે છે. પ્રભાસ અને વાંગાના આ કોમ્બિનેશને અત્યારથી જ સોશિયલ મીડિયા પર ધૂમ મચાવી દીધી છે.

સંદીપ વાંગાની ફિલ્મ ફરી ટ્રોલ

સંદીપ વાંગાની ફિલ્મ ફરી ટ્રોલર્સના નિશાને, પ્રભાસના ઘાતક લુકને ફેન્સે રણબીરની કોપી ગણાવી..

January 1, 2026 | 21:56 IST