લોકેશ કનગરાજના ઘરે પોલીસ રેડ: ૧૦ AK-47 જપ્ત

તમિલનાડુમાં આગામી વિધાનસભા ચૂંટણીને પગલે સમગ્ર રાજ્યમાં કડક આચારસંહિતા લાગુ કરવામાં આવી છે. આ દરમિયાન દક્ષિણ ભારતીય સિનેમાના દિગ્ગજ ડિરેક્ટર લોકેશ કનગરાજના ચેન્નઈ સ્થિત નિવાસસ્થાને પોલીસની ફ્લાઈંગ સ્ક્વોડ દ્વારા દરોડા પાડવામાં આવતા ફિલ્મ જગતમાં સનસનાટી મચી ગઈ હતી. તપાસ દરમિયાન પોલીસને ત્યાંથી ૧૦ જેટલી AK-47 રાઈફલો મળી આવતા મામલો ગંભીર બન્યો હતો.

તપાસમાં મોટો ખુલાસો: અસલી નહીં પણ ડમી હથિયારો

પોલીસના ઉચ્ચ અધિકારીઓએ આ મામલે સ્પષ્ટતા કરતા જણાવ્યું હતું કે, પ્રાથમિક દ્રષ્ટિએ આ હથિયારો જોખમી જણાતા હતા, પરંતુ ઝીણવટભરી તપાસ બાદ માલૂમ પડ્યું કે આ તમામ રાઈફલો નકલી એટલે કે 'ડમી ગન' હતી. લોકેશ કનગરાજની આગામી ફિલ્મના શૂટિંગ માટે આ પ્રોપ્સ (નકલી હથિયારો) મંગાવવામાં આવ્યા હતા. ફિલ્મની પ્રોડક્શન ટીમે આ હથિયારોના ઉપયોગ માટેના તમામ કાનૂની દસ્તાવેજો અને પરવાનગીના કાગળો પોલીસ સમક્ષ રજૂ કર્યા હતા. દસ્તાવેજી ચકાસણી પૂર્ણ થયા બાદ પોલીસે આ ડમી હથિયારો ટીમને પરત સોંપ્યા હતા.

લોકેશ કનગરાજ: તમિલ સિનેમાના માસ્ટરમાઈન્ડ 

માત્ર ૪૦ વર્ષની વયે લોકેશ કનગરાજે ભારતીય સિનેમામાં પોતાની અલગ ઓળખ બનાવી છે. 'કેદી', 'માસ્ટર', 'વિક્રમ' અને થલાપતિ વિજય સ્ટારર 'લિયો' જેવી સુપરહિટ ફિલ્મો આપ્યા બાદ તેઓ અત્યારે ઇન્ડસ્ટ્રીના સૌથી મોંઘા ડિરેક્ટરોમાંના એક છે. તેમણે 'લોકેશ સિનેમેટિક યુનિવર્સ' (LCU) દ્વારા ફિલ્મોને એકબીજા સાથે જોડવાનો નવો ટ્રેન્ડ શરૂ કર્યો છે, જેના કરોડો ચાહકો છે.

આગામી મોટા પ્રોજેક્ટ્સ પર નજર : 

લોકેશ કનગરાજ હાલમાં અનેક મોટા બજેટના પ્રોજેક્ટ્સમાં વ્યસ્ત છે. તેઓ 'પુષ્પા' ફેમ અલ્લુ અર્જુન સાથે એક પાન-ઈન્ડિયા ફિલ્મ (#AA23) પર કામ કરી રહ્યા છે. આ ઉપરાંત, બોલિવૂડ સુપરસ્ટાર આમિર ખાન સાથે એક ભવ્ય સુપરહીરો ફિલ્મ બનાવવાની જાહેરાત પણ તેમણે કરી છે. લોકેશ ટૂંક સમયમાં ફિલ્મ 'DC' દ્વારા અભિનયના ક્ષેત્રમાં પણ પદાર્પણ કરવા જઈ રહ્યા છે.

ચૂંટણીના માહોલમાં થયેલી આ પોલીસ કાર્યવાહીએ સોશિયલ મીડિયા પર ચર્ચાઓ જગાવી હતી, પરંતુ સત્ય સામે આવ્યા બાદ લોકેશના ચાહકોએ રાહતનો શ્વાસ લીધો છે.