જાણીતા અભિનેતા પરેશ રાવલની આગામી ફિલ્મ 'ધ તાજ સ્ટોરી'નું મોશન પોસ્ટર રિલીઝ થતાં જ વિવાદનો મધપૂડો છંછેડાઈ ગયો છે. 31 ઓક્ટોબરના રોજ સિનેમાઘરોમાં રિલીઝ થનારી આ ફિલ્મના પોસ્ટરમાં તાજ મહેલનો ગુંબજ ઊંચકાય છે અને તેમાંથી ભગવાન શિવનું શિવલિંગ બહાર નીકળતું દર્શાવવામાં આવ્યું છે.
મોશન પોસ્ટર ઈન્સ્ટાગ્રામ પર રિલીઝ કર્યું
પરેશ રાવલે આ મોશન પોસ્ટર ઈન્સ્ટાગ્રામ પર રિલીઝ કર્યું હતું, જેમાં કેપ્શન લખ્યું હતું કે, તમને જે કંઈ ભણાવ્યું છે તે ખોટું નીકળે તો? સત્ય ન માત્ર છુપાયેલું છે, પરંતુ તેના પર પ્રશ્નો ઉઠાવવામાં આવી રહ્યા છે. 31 ઓક્ટોબરે 'ધ તાજ સ્ટોરી' સાથે સત્ય જાણો. આ પ્રસ્તુતિને કારણે સોશિયલ મીડિયા યુઝર્સ ભડકી ઉઠ્યા છે અને અભિનેતા પર સાતમી અજાયબી તાજ મહેલને 'તેજો મહાલય' ગણાવવાનો પ્રોપગેન્ડા ચલાવવાનો આક્ષેપ લગાવી રહ્યા છે.
નિર્માતાઓએ તાત્કાલિક ડિસ્ક્લેમર શેર કર્યું
આ વિવાદ સર્જાતા જ ફિલ્મ 'ધ તાજ સ્ટોરી'ના નિર્માતાઓએ તાત્કાલિક ડિસ્ક્લેમર શેર કર્યું છે. આ સ્પષ્ટતામાં જણાવવામાં આવ્યું છે કે, "આ ફિલ્મ કોઈ પણ ધાર્મિક બાબતો સાથે સંબંધિત નથી કે, તે તાજમહેલની અંદર શિવ મંદિર હોવાનો દાવો પણ કરતી નથી. તે માત્ર ઐતિહાસિક તથ્યો પર ધ્યાન કેન્દ્રિત કરે છે. અમે તમને નમ્ર વિનંતી કરીએ છીએ કે, ફિલ્મ જુઓ અને પછી જ તમારો પોતાનો અભિપ્રાય બનાવો." જોકે, પરેશ રાવલ અને નિર્માતાઓની આ સ્પષ્ટતા બાદ પણ યુઝર્સ શાંત થયા નથી અને તેમને સતત ટ્રોલ કરી રહ્યા છે, તેમજ એક્ટરના ફેન્સ પણ તેમની સામે નારાજગી વ્યક્ત કરી રહ્યા છે.
આ પણ વાંચો:<a href="https://www.benefitnews24.com/gujarati/entertainment/the-controversy-over-herapheri-3-has-been-resolved-/15327" target="_blank" rel="noopener"> </a><a href="https://www.benefitnews24.com/gujarati/entertainment/the-controversy-over-herapheri-3-has-been-resolved-/15327" target="_blank" rel="noopener">'હેરાફેરી 3'નો વિવાદ થાળે પડ્યો!</a>
પત્ની મુમતાઝની યાદમાં આ ઇમારત બનાવી
આ ફિલ્મની વાર્તા કથિત ઈતિહાસકાર પીએન ઓકના જૂના દાવા પર આધારિત હોવાનું કહેવામાં આવી રહ્યું છે. પીએન ઓક એ 1989માં દાવો કર્યો હતો કે, તાજમહેલ પહેલા 'તેજો મહાલય' નામના હિન્દુ મંદિર તરીકે ઓળખાતું હતું. નોંધનીય છે કે, મુઘલ બાદશાહ શાહજહાં એ તેમની પત્ની મુમતાઝની યાદમાં આ ભવ્ય ઇમારત બનાવી હતી, જેને દુનિયાની સાત અજાયબીઓમાં સ્થાન મળેલું છે. તાજમહેલ આર્કિયોલોજિકલ સર્વે ઓફ ઇન્ડિયાની સંરક્ષિત ઇમારત છે અને 1983માં તેને વર્લ્ડ હેરિટેજ (વૈશ્વિક ધરોહર) જાહેર કરવામાં આવ્યું છે.
પોસ્ટર પરના વિવાદથી ફિલ્મની ચર્ચા&nbsp;
'ધ તાજ સ્ટોરી' એક કોર્ટ રૂમ ડ્રામા હોવાનું કહેવાય છે, જેના લેખક અને ડિરેક્ટર અમરીશ ગોયલ છે. ફિલ્મમાં પરેશ રાવલ ઉપરાંત ઝાકીર હુસૈન, અમૃતા ખાનવિલકર, નમિત દાસ અને સ્નેહા વાઘ જેવા કલાકારો મુખ્ય ભૂમિકામાં જોવા મળશે. આ ફિલ્મની રિલીઝ ડેટ 31 ઓક્ટોબર છે, અને પોસ્ટર પરના વિવાદથી ફિલ્મને ચોક્કસપણે ચર્ચા મળી છે, પરંતુ તે ઐતિહાસિક તથ્યો અને જનમાનસની આસ્થા વચ્ચે એક નવો સંઘર્ષ ઊભો કરી શકે છે.

પરેશ રાવલની ફિલ્મ ધ તાજ સ્ટોરી'ના પોસ્ટરમાં તાજમહેલમાંથી શિવલિંગનીકળતું દર્શાવાયું

September 30, 2025 | 21:04 IST