નશામાં ધૂત ડ્રાઈવરે નોરા ફતેહીની કારને અડફેટે લીધી

બોલીવુડની જાણીતી ડાન્સર અને અભિનેત્રી નોરા ફતેહીની કારનો 20 ડિસેમ્બરે બપોરે મુંબઈમાં ગંભીર અકસ્માત થયો હતો. નશામાં ધૂત એક ડ્રાઈવરે તેની કારને જોરદાર ટક્કર મારી, જેના કારણે નોરાને માથામાં સામાન્ય ઈજા થઈ. આ અકસ્માત અંધેરી વેસ્ટના લિંક રોડ પર બપોરે  4 વાગ્યે બન્યો, જ્યારે નોરા સનબર્ન ફેસ્ટિવલ 2025માં ડેવિડ ગુએટા સાથે પરફોર્મ કરવા જઈ રહી હતી.

નોરાએ પોતાના ઇન્સ્ટાગ્રામ સ્ટોરી પર વીડિયો શેર કરીને જણાવ્યું કે, "હું ઠીક છું. આજે બપોરે મારો ગંભીર અકસ્માત થયો હતો. નશામાં ધૂત વ્યક્તિએ મારી કારને ટક્કર મારી, અસર એટલી તીવ્ર હતી કે હું કારમાં ફંગોળાઈ ગઈ અને મારું માથું બારી સાથે અથડાયું." તેણે આ ઘટનાને "ખૂબ ડરામણી અને આઘાતજનક" ગણાવી અને કહ્યું કે તેને થોડી સોજો અને હળવું કન્કશન થયું છે, પરંતુ તે જીવિત અને સ્વસ્થ છે. નોરાએ લોકોને દારૂ પીને વાહન ન ચલાવવાની સલાહ આપી અને કહ્યું, "2025 છે અને હજી આ વાત કરવી પડે છે, આ અક્ષમ્ય છે."

અકસ્માત બાદ નોરાની ટીમે તેને તરત જ નજીકની હોસ્પિટલમાં લઈ જઈને સીટી સ્કેન કરાવ્યો, જેમાં કોઈ ગંભીર ઈજા નહોતી. ડોક્ટરોએ આરામની સલાહ આપી, પરંતુ નોરાએ પોતાની પ્રોફેશનલ કમિટમેન્ટ પૂરી કરવા માટે સનબર્ન ફેસ્ટિવલમાં પરફોર્મન્સ આપ્યું. તેણે કહ્યું, "હું મારા કામ, મહેનત અને મળેલી તકોને કોઈની મૂર્ખાઈથી ખોટી નહીં જવા દઉં." તેના આ પરફોર્મન્સના વીડિયો વાયરલ થયા છે અને ફેન્સ તેની હિંમતની પ્રશંસા કરી રહ્યા છે.

મુંબઈ પોલીસે નશામાં ધૂત ડ્રાઈવરને અટકાયત કરી છે અને તેની સામે રેશ ડ્રાઈવિંગ તેમજ નશામાં વાહન ચલાવવાના આરોપ હેઠળ કેસ નોંધ્યો છે. આ વર્ષે સનબર્ન ફેસ્ટિવલ પરંપરાગત ગોવાને બદલે મુંબઈમાં યોજાયો છે.

નોરા ફતેહીનું વર્કફ્રન્ટ

કેનેડામાં જન્મેલી અને મોરોક્કન મૂળની નોરા લગભગ 10 વર્ષ પહેલાં માત્ર 5,000 રૂપિયા સાથે ભારત આવી હતી. સંઘર્ષ પછી 'દિલબર', 'સાકી સાકી', 'કામરિયા' જેવા હિટ ગીતોથી સ્ટાર બની. તે 'સ્ટ્રીટ ડાન્સર 3ડી', 'ભુજ: ધ પ્રાઇડ ઓફ ઇન્ડિયા', 'ક્રેક' જેવી ફિલ્મોમાં કામ કરી ચૂકી છે. આગામી પ્રોજેક્ટ્સમાં સાઉથની હોરર ફિલ્મ 'કંચના 4' અને 'કેડી: ધ ડેવિલ' સામેલ છે.