નાના પાટેકરના નિધન બાદ તનુશ્રી દત્તાએ એવું શું કહ્યું કે AICWA ભડકી ઉઠ્યું?

AICWA Slams On Tanushree Dutta: બોલિવૂડના દિગ્ગજ અભિનેતા નાના પાટેકરના 8 ઓક્ટોબર, 2026ના રોજ નિધનથી સમગ્ર ફિલ્મ ઈન્ડસ્ટ્રીમાં શોકની લાગણી છવાઈ ગઈ છે. 75 વર્ષીય નાના પાટેકરના નિધન બાદ અક્ષય કુમાર, રિતેશ દેશમુખ, અમિતાભ બચ્ચન, શાહરૂખ ખાન અને સલમાન ખાન સહિત અનેક કલાકારોએ સોશિયલ મીડિયા પર પોસ્ટ કરીને તેમને શ્રદ્ધાંજલિ આપી. નાના પાટેકરનું નિધન ગોવામાં થયું હતું અને હોસ્પિટલના જણાવ્યા અનુસાર તેમને કાર્ડિયાક અરેસ્ટ આવ્યો હતો. પરંતુ નાના પાટેકરના નિધન બાદ અભિનેત્રી તનુશ્રી દત્તાના સોશિયલ મીડિયા નિવેદને બોલિવૂડમાં નવી ચર્ચા જગાવી છે. તનુશ્રીએ ઇન્સ્ટાગ્રામ પર એક વીડિયો શેર કરીને દિવંગત અભિનેતા અંગે આકરી અને અપમાનજનક ભાષાનો ઉપયોગ કર્યો હતો. આ નિવેદન બાદ ઓલ ઈન્ડિયા સિને વર્કર્સ એસોસિએશન (AICWA)એ તનુશ્રી દત્તાની ટીકા કરી છે.

AICWAએ તનુશ્રી દત્તાને શું કહ્યું?
AICWAના સ્થાપક અને પ્રમુખ સુરેશ શ્યામલાલ ગુપ્તાએ વીડિયો શેર કરીને કહ્યું કે એસોસિએશન નાના પાટેકરના નિધન બાદ તનુશ્રી દત્તાની ટિપ્પણીની સખત નિંદા કરે છે. AICWAએ આરોપ લગાવ્યો કે અભિનેત્રી આવા સમયે સસ્તી પ્રસિદ્ધિ મેળવવાનો પ્રયાસ કરી રહી છે. એસોસિએશને નાના પાટેકરના ભારતીય સિનેમા અને સમાજ માટેના યોગદાનનો પણ ઉલ્લેખ કર્યો. AICWAના જણાવ્યા અનુસાર, નાના પાટેકરને પદ્મશ્રીથી સન્માનિત કરવામાં આવ્યા હતા અને તેમણે પોતાના ફાઉન્ડેશન દ્વારા પીડિત ખેડૂતોના પરિવારોને મદદ કરી હતી. કારગિલ યુદ્ધ દરમિયાન તેમના યોગદાનનો પણ એસોસિએશને ઉલ્લેખ કર્યો. AICWAએ કહ્યું કે નાના પાટેકરના પરિવાર પ્રત્યે તેમની સંવેદના છે, પરંતુ તેમના નિધન બાદ સોશિયલ મીડિયા પર કરવામાં આવેલી તનુશ્રીની ટિપ્પણી “વાંધાજનક, અસંવેદનશીલ અને શરમજનક” છે. એસોસિએશને તનુશ્રીને જાહેર નિવેદનોમાં ભાષાનું ધ્યાન રાખવાની અપીલ પણ કરી છે.

તનુશ્રી દત્તાએ પોતાના નિવેદનનો બચાવ કર્યો
AICWAની ટીકા બાદ તનુશ્રી દત્તાએ ફરી એકવાર પોતાના દૃષ્ટિકોણને સમજાવવાનો પ્રયાસ કર્યો. લખનૌના એક કાર્યક્રમ દરમિયાન મીડિયા દ્વારા તેમના નિવેદન અંગે સવાલ પૂછવામાં આવતા તેમણે કહ્યું કે છેલ્લા કેટલાક વર્ષોમાં તેમણે ઘણું સહન કર્યું છે અને #MeToo સાથે જોડાયેલા પોતાના અનુભવને લઈને તેઓ પરેશાન રહી છે. તનુશ્રીએ પોતાના દાવામાં કહ્યું કે એક પીડિત તરીકે ચાલી રહેલા કેસને પાછો ખેંચવા માટે તેમના પર દબાણ કરવામાં આવ્યું હતું. તેમણે દાવો કર્યો કે તેમને લાલચ પણ આપવામાં આવી હતી, પરંતુ તેમણે કેસ પાછો ખેંચ્યો નહીં. અભિનેત્રીએ વધુમાં દાવો કર્યો કે ત્યારબાદ તેમને અનેક મુશ્કેલીઓનો સામનો કરવો પડ્યો, જેમાં તેમની કારની બ્રેક કાપવામાં આવી હોવાનો, અકસ્માત થયો હોવાનો અને ફૂડ પોઇઝનિંગનો ભોગ બન્યાનો સમાવેશ થાય છે. તેમણે કહ્યું કે જે વ્યક્તિએ આવી પરિસ્થિતિનો સામનો કર્યો નથી, તે કદાચ તેમની લાગણી સમજી નહીં શકે.

નાના પાટેકરનું નિધન કેવી રીતે થયું?
નાના પાટેકરને છાતીમાં તીવ્ર દુખાવો થયા બાદ ગોવામાં તેમના નિવાસસ્થાનેથી હોસ્પિટલ લઈ જવામાં આવ્યા હતા. મણિપાલ હોસ્પિટલના ડૉ. શેખર સાલકરે જણાવ્યું હતું કે તેમને બચાવવા માટે આશરે 45 મિનિટ સુધી CPR અને કાર્ડિયાક મસાજના પ્રયાસો કરવામાં આવ્યા હતા, પરંતુ તેમને બચાવી શકાયા નહોતા. નાના પાટેકરના અંતિમ સંસ્કાર પુણે સ્થિત તેમના ફાર્મહાઉસ ખાતે રાજકીય સન્માન સાથે કરવામાં આવ્યા હતા. તેમના નિધન સાથે બોલીવુડના એક દિગ્ગજ અભિનેતાની સફરનો અંત આવ્યો, પરંતુ તેમના નિધન બાદ તનુશ્રી દત્તાના નિવેદન અને AICWAની પ્રતિક્રિયાએ એક અલગ જ ચર્ચાને જન્મ આપ્યો છે.