KBC 17 ફિનાલે: અમિતાભ બચ્ચનની સંગીતમય વિદાય

KBC 17 પૂર્ણ: અમિતાભ બચ્ચને ગીતો ગાઈને યાદગાર ફિનાલે બનાવ્યો

ટેલિવિઝન જગતનો સૌથી લોકપ્રિય ક્વિઝ શો કૌન બનેગા કરોડપતિ તેની 17મી સીઝન સાથે સંપન્ન થયો છે. 2 જાન્યુઆરી, શનિવારના રોજ આ સીઝનનો અંતિમ એપિસોડ પ્રસારિત કરવામાં આવ્યો હતો. આ ખાસ પ્રસંગે શોના સંચાલક અમિતાભ બચ્ચન અત્યંત ભાવુક જોવા મળ્યા હતા. તેમણે આ મંચ પરથી દર્શકોનો હૃદયપૂર્વક આભાર માન્યો હતો.

જીવનના ત્રણ દાયકા અને અતૂટ સંબંધ : 

અમિતાભ બચ્ચને શો દરમિયાન જણાવ્યું કે તેમનો અને આ શોનો સાથ ઘણો જૂનો છે. તેમણે પોતાના જીવનનો મોટો હિસ્સો આ શોના માધ્યમથી દર્શકો સાથે વિતાવ્યો છે. અંતિમ એપિસોડ વખતે તેમણે સ્વીકાર્યું કે આ સફર ક્યારે શરૂ થઈ અને ક્યારે પૂરી થઈ ગઈ તેની સમજ પણ ન પડી. તેમણે પ્રેક્ષકોના સ્નેહને બિરદાવતા કહ્યું કે આ રમતનું અસ્તિત્વ માત્ર ચાહકોને કારણે જ છે.

32 મિનિટ સુધી સંગીતની મહેફિલ : 

ફિનાલે એપિસોડને યાદગાર બનાવવા માટે બિગ બીએ ગાયકીની કમાન સંભાળી હતી. તેમણે સતત 32 મિનિટ સુધી પોતાના ફિલ્મી કરિયરના સુપરહિટ ક્લાસિક ગીતો રજૂ કર્યા હતા. હોળીના ગીતોથી લઈને લોકપ્રિય ફિલ્મી ગીતો પર તેમણે પ્રેક્ષકોને ઝૂમતા કરી દીધા હતા. ગીતોની વચ્ચે તેમણે રમૂજ કરીને વાતાવરણને હળવું રાખ્યું હતું. અંતમાં તેમણે હરિવંશ રાય બચ્ચનની કવિતાનું ગાન કરીને શોને વિરામ આપ્યો હતો.

સીઝનની ઉપલબ્ધિઓ : 

11 ઓગસ્ટ 2025ના રોજ શરૂ થયેલી આ 17મી સીઝનમાં ઘણા રસપ્રદ સ્પર્ધકો જોવા મળ્યા. ઉત્તરાખંડના આદિત્ય કુમાર આ સીઝનના પ્રથમ કરોડપતિ બન્યા હતા. છેલ્લા સપ્તાહમાં મનોરંજન જગતના અનેક જાણીતા કલાકારો અને અમિતાભના પૌત્ર અગસ્ત્ય નંદાએ પણ હાજરી આપીને શોની રોનક વધારી હતી.