કપિલ શર્મા શો કાનૂની વિવાદમાં: કોપીરાઈટ ભંગનો કેસ

કોમેડી કિંગ કપિલ શર્માનો લોકપ્રિય કાર્યક્રમ "ધ ગ્રેટ ઇન્ડિયન કપિલ શો" હાલ કાયદાકીય મુશ્કેલીઓમાં ઘેરાયો છે. નેટફ્લિક્સ પર પ્રસારિત થતા આ શો પર બોલિવૂડના હિટ ગીતોનો ગેરકાયદેસર ઉપયોગ કરવાનો આરોપ લાગ્યો છે, જેના કારણે નિર્માતાઓ વિરુદ્ધ બોમ્બે હાઈકોર્ટમાં કેસ દાખલ કરવામાં આવ્યો છે.

શું છે સમગ્ર વિવાદ?

ફોનોગ્રાફિક પર્ફોર્મન્સ લિમિટેડ (PPL) ઇન્ડિયા દ્વારા આ કાનૂની કાર્યવાહી કરવામાં આવી છે. સંસ્થાનો દાવો છે કે શોની ત્રીજી સીઝનમાં નિર્માતાઓએ સત્તાવાર લાયસન્સ લીધા વિના ત્રણ પ્રખ્યાત ફિલ્મી ગીતોનો ઉપયોગ કર્યો છે. કોપીરાઈટ એક્ટ 1957 મુજબ, કોઈપણ ગીતને જાહેર પ્લેટફોર્મ પર વગાડવા માટે તેના અધિકારધારકની મંજૂરી લેવી અનિવાર્ય છે, જે આ કિસ્સામાં લેવામાં આવી નથી.

કયા ગીતો પર સર્જાયો વિવાદ?

શોના અલગ-અલગ એપિસોડમાં નીચે મુજબના ગીતોનો ઉપયોગ કરવામાં આવ્યો હતો:

ફિલ્મ 'મુન્ના ભાઈ એમબીબીએસ'નું ગીત "M બોલે તો" (સિદ્ધાર્થ મલ્હોત્રા અને જાહ્નવી કપૂરવાળો એપિસોડ).

ફિલ્મ 'કાંટે'નું ટ્રેક "રામા રે".

ફિલ્મ 'દેશી બોયઝ'નું લોકપ્રિય ગીત "સુબહ હોને ના દે".

આ ગીતો જૂનથી સપ્ટેમ્બર દરમિયાન સ્ટ્રીમ થયેલા એપિસોડમાં દર્શાવવામાં આવ્યા હતા. આ મામલે કપિલની પ્રોડક્શન કંપની K9 ફિલ્મ્સ અને બીઇંગયુ સ્ટુડિયો સામે કોપીરાઈટ ઉલ્લંઘનનો ગુનો નોંધાવવામાં આવ્યો છે.

ચોથી સીઝનનો પ્રારંભ : 

એકતરફ શો વિવાદોમાં છે, તો બીજી તરફ તેની ચોથી સીઝન શરૂ થઈ ચૂકી છે. આ સીઝનના પ્રથમ એપિસોડમાં ગ્લોબલ સ્ટાર પ્રિયંકા ચોપરા મહેમાન તરીકે ઉપસ્થિત રહી હતી. પ્રિયંકાએ પોતાની આગામી ફિલ્મ અને અંગત જીવન વિશે અનેક રસપ્રદ વાતો શેર કરી હતી. ઉલ્લેખનીય છે કે પ્રિયંકા ટૂંક સમયમાં એસએસ રાજામૌલીના મોટા બજેટના પ્રોજેક્ટમાં જોવા મળશે