સાઉથ સિનેમાના સુપરસ્ટાર જુનિયર NTR ની લોકપ્રિયતા જગજાહેર છે, પરંતુ ક્યારેક આ દીવાનગી ગંભીર અકસ્માતનું કારણ બની જતી હોય છે. તાજેતરમાં બેંગ્લોરમાં એક હોસ્પિટલના ઉદ્ઘાટન પ્રસંગે પહોંચેલા એક્ટરની એક ઝલક મેળવવા માટે ચાહકો એટલા બેકાબૂ બન્યા કે હોસ્પિટલના પરિસરમાં તોડફોડના દ્રશ્યો સર્જાયા હતા. સ્થિતિ વણસતા આખરે પોલીસને બળપ્રયોગ કરવાની ફરજ પડી હતી.
હોસ્પિટલના ઉદ્ઘાટનમાં સર્જાઈ નાસભાગ :&nbsp;
ગઈકાલે 8 માર્ચના રોજ જુનિયર NTR બેંગ્લોરની પ્રસિદ્ધ KIMS સુપર સ્પેશિયાલિટી હોસ્પિટલના ઉદ્ઘાટન માટે પહોંચ્યા હતા. તેમના આગમનના સમાચાર વાયુવેગે ફેલાતા જ હજારોની સંખ્યામાં ચાહકો હોસ્પિટલની બહાર અને અંદર એકઠા થઈ ગયા હતા. એક્ટર જેવા જ કાર્યક્રમ સ્થળે પહોંચ્યા, કે તરત જ તેમને નજીકથી જોવા માટે લોકો વચ્ચે ધક્કામુક્કી શરૂ થઈ ગઈ હતી. આ અફરાતફરીમાં જુનિયર NTR પોતે પણ ભીડમાં ફસાઈ ગયા હતા.
સિક્યોરિટી ટીમ અને સ્થાનિક વહીવટી તંત્રએ ભારે જહેમત ઉઠાવીને એક્ટરને સુરક્ષિત રીતે બહાર કાઢ્યા હતા. જોકે, આ દરમિયાન ભીડ એટલી હિંસક બની હતી કે હોસ્પિટલના એસ્કેલેટર સહિતની મિલકતોને નુકસાન પહોંચ્યું હતું. ભીડને વિખેરવા માટે પોલીસે લાઠીચાર્જ કરવો પડ્યો હતો.
સેલિબ્રિટી ક્રેઝ અને અગાઉના જીવલેણ અકસ્માતો :&nbsp;
આ કોઈ પ્રથમ ઘટના નથી જ્યાં ફેન ફોલોઈંગના કારણે મોટી દુર્ઘટના સર્જાઈ હોય. અગાઉ પણ સાઉથના અન્ય કલાકારોની ઇવેન્ટમાં લોહિયાળ દ્રશ્યો જોવા મળ્યા છે:
થલાપતિ વિજય: ગયા વર્ષે સપ્ટેમ્બર મહિનામાં થલાપતિ વિજયની એક રાજકીય રેલી દરમિયાન થયેલી નાસભાગમાં 40 લોકોએ જીવ ગુમાવ્યા હતા.
અલ્લુ અર્જુન: તાજેતરમાં &lsquo;પુષ્પા 2&rsquo; ના સ્ક્રીનિંગ સમયે હૈદરાબાદના સંધ્યા થિયેટરમાં અલ્લુ અર્જુનને જોવા ઉમટેલી ભીડમાં એક મહિલાનું કરુણ મોત નિપજ્યું હતું. આ મામલે એક્ટર વિરુદ્ધ કાયદેસરની ફરિયાદ પણ નોંધાઈ હતી.
સુરક્ષા વ્યવસ્થા પર ઉઠતા સવાલ :&nbsp;
જ્યારે પણ કોઈ મોટા સુપરસ્ટાર જાહેર કાર્યક્રમમાં ભાગ લે છે, ત્યારે સુરક્ષાના દાવાઓ પોકળ સાબિત થતા હોય છે. બેંગ્લોરની આ ઘટના બાદ સોશિયલ મીડિયા પર લોકો કલાકારો અને આયોજકોને વધુ જવાબદાર બનવા અપીલ કરી રહ્યા છે. હોસ્પિટલ જેવા સંવેદનશીલ સ્થળે આવી અરાજકતા દર્દીઓ માટે પણ જોખમી સાબિત થઈ શકે છે.

જુનિયર NTR બેંગ્લોર હોસ્પિટલ ભીડ

બેંગ્લોરમાં એક્ટરને જોવા ઉમટી ભીડ, પોલીસે કરવો પડ્યો લાઠીચાર્જ,અગાઉ આવી ઘટનામાં થયા છે મોત

March 9, 2026 | 15:03 IST