હની સિંહની વિવાદાસ્પદ ટિપ્પણી: રેપરે માંગી માફી

પ્રખ્યાત ગાયક અને રેપર યો યો હની સિંહ એકવાર ફરી પોતાની વાણીને કારણે મુશ્કેલીમાં મુકાયા છે. મકર સંક્રાંતિના દિવસે દિલ્હીમાં યોજાયેલા એક લાઈવ કોન્સર્ટ દરમિયાન હની સિંહે સ્ટેજ પરથી કેટલીક એવી વાતો કરી હતી, જેના કારણે સોશિયલ મીડિયા પર ભારે રોષ જોવા મળી રહ્યો છે. ઠંડીના માહોલમાં યુવા પેઢીને સંબોધતા રેપરે વાંધાજનક શબ્દોનો પ્રયોગ કર્યો હતો, જેનો વીડિયો વાઇરલ થતા જ વિવાદ વકર્યો હતો.

શું હતો સમગ્ર વિવાદ ?

દિલ્હીની એક લાઈવ ઈવેન્ટમાં હની સિંહે પ્રેક્ષકો સાથે વાતચીત કરતી વખતે મર્યાદા ઓળંગી હતી. તેમણે જનરેશન-ઝેડ (Gen-Z) ઓડિયન્સને સંબોધવા માટે જે ભાષાનો ઉપયોગ કર્યો તે ઘણા લોકોને અશોભનીય લાગ્યો. આ નિવેદન બાદ લોકોએ તેમને ટ્રોલ કરવાનું શરૂ કર્યું અને સોશિયલ મીડિયા પર તેમની સંસ્કૃતિ અને જવાબદારી અંગે સવાલો ઉઠાવ્યા.

હની સિંહની સ્પષ્ટતા અને માફી : 

ચારેબાજુથી ઘેરાયા બાદ હની સિંહે પોતાના ઈન્સ્ટાગ્રામ પર એક સ્પષ્ટતા કરતો વીડિયો જાહેર કર્યો છે. તેમણે જણાવ્યું કે વાઇરલ થઈ રહેલો વીડિયો એડિટ કરવામાં આવ્યો છે અને તે માત્ર યુવાનોને જાગૃત કરવા માંગતા હતા. તેમણે ઉમેર્યું કે તાજેતરમાં કેટલાક ડોક્ટરો સાથેની મુલાકાત બાદ તેમને જાણવા મળ્યું હતું કે આજની પેઢી અસુરક્ષિત સંબંધોને કારણે સ્વાસ્થ્યની ગંભીર સમસ્યાઓનો સામનો કરી રહી છે. આ ગંભીર મેસેજ આપવા માટે તેમણે યુવાનોને સમજાય તેવી 'OTT' સ્ટાઈલની ભાષા પસંદ કરી હતી.

ભવિષ્યમાં સંયમ રાખવાની ખાતરી : 

રેપરે સ્વીકાર્યું કે તેમની ભાષાની પસંદગી ખોટી હોઈ શકે છે. તેમણે હૃદયપૂર્વક માફી માંગતા કહ્યું કે તેમનો ઈરાદો કોઈની લાગણી દુભાવવાનો નહોતો. વીડિયોના કેપ્શનમાં 'ભૂલચૂક માફ' લખીને તેમણે ખાતરી આપી છે કે હવેથી તેઓ જાહેર મંચ પર બોલતી વખતે ગંભીરતા રાખશે અને પોતાની વાણી પર સંયમ જાળવશે.