Dhurandhar Misses Grammy: બોક્સ ઓફિસ પર ધમાકેદાર સફળતા મેળવનારી અને પોતાના સંગીતથી ચાહકોને ઝૂમવા મજબૂર કરનારી રણવીર સિંહની ફિલ્મ ‘ધુરંધર’ માટે એક નિરાશાજનક સમાચાર સામે આવ્યા છે. ફિલ્મનાં ગીતો ગ્રેમી એવોર્ડ્સ 2027ની રેસમાં સામેલ થવાની આશા જગાવી રહ્યાં હતાં, પરંતુ અંતિમ નોમિનેશન યાદીમાં એકપણ ગીત સ્થાન મેળવી શક્યું નથી. 16 નવેમ્બરે જાહેર થયેલી ગ્રેમી નોમિનેશન યાદીમાં ‘ધુરંધર’નાં તમામ ગીતો બહાર થઈ જતાં ફિલ્મના ચાહકોને મોટો ઝટકો લાગ્યો છે. આદિત્ય ધરના નિર્દેશનમાં બનેલી ‘ધુરંધર’ માત્ર તેની સ્ટોરી અને એક્શનને કારણે જ નહીં, પરંતુ તેના સંગીતને કારણે પણ ચર્ચામાં રહી છે. ફિલ્મમાં જૂનાં હિન્દી ગીતોના નવા વર્ઝન સાથે અનેક ઓરિજિનલ ગીતોનો સમાવેશ કરવામાં આવ્યો છે. શાશ્વત સચદેવના સંગીતે ફિલ્મને અલગ ઓળખ અપાવી હતી. આ જ લોકપ્રિયતાને ધ્યાનમાં રાખીને ફિલ્મનાં કેટલાંક ગીતો ગ્રેમી 2027ની વિવિધ કેટેગરીમાં વિચારણા માટે સબમિટ કરવામાં આવ્યાં હતાં.
ગ્રેમીની ચાર મોટી કેટેગરીમાં હતી ‘ધુરંધર’ની દાવેદારી
‘ધુરંધર’નાં ગીતોને બેસ્ટ સોંગ રિટન ફોર વિઝ્યુઅલ મીડિયા, બેસ્ટ એશિયન પોપ મ્યુઝિક પર્ફોર્મન્સ, બેસ્ટ ગ્લોબલ મ્યુઝિક પર્ફોર્મન્સ અને બેસ્ટ પોપ ડ્યૂઓ/ગ્રુપ પર્ફોર્મન્સ સહિતની કેટેગરીમાં વિચારણા માટે મોકલવામાં આવ્યાં હતાં. જોકે, અંતિમ યાદીમાં ફિલ્મનું એકપણ ગીત સ્થાન મેળવી શક્યું નથી. ફિલ્મનું ગીત ‘ફિર સે’, જેને અરિજિત સિંહે અવાજ આપ્યો છે, તેને બેસ્ટ સોંગ રિટન ફોર વિઝ્યુઅલ મીડિયા કેટેગરીમાં સબમિટ કરવામાં આવ્યું હતું. જોકે, આ ગીતને નોમિનેશન મળ્યું નથી. આ કેટેગરીમાં ‘હાઉસ’ (વુધરિંગ હાઇટ્સ), ‘આઈ નો ઈટ, આઈ નો યુ’ (ટોય સ્ટોરી 5), ‘નીડ સમવન’ (ધ પિટ), ‘નો પ્લેસ લાઈક હોમ’ (વિક્ડ: ફોર ગુડ) અને ‘રનઅવે’ (ધ ડેવિલ વિયર્સ પ્રાડા 2) જેવા ગીતોએ સ્થાન મેળવ્યું છે.
‘આરી આરી’ પણ ગ્રેમી નોમિનેશનથી રહી ગયું દૂર
‘ધુરંધર’નું લોકપ્રિય ગીત ‘આરી આરી’ પણ ગ્રેમી 2027ની બેસ્ટ એશિયન પોપ મ્યુઝિક પર્ફોર્મન્સ કેટેગરીમાં વિચારણા માટે સબમિટ થયું હતું. બોમ્બે રોકર્સ, ખાન સાબ, જાસ્મીન સેન્ડલાસ, રેબેલ, ટોકન અને સુધીર યાદવંશી જેવા કલાકારોએ આ ગીતને અવાજ આપ્યો છે. જોકે, આ ગીત પણ અંતિમ નોમિનેશન યાદીમાં સ્થાન મેળવી શક્યું નથી. આ કેટેગરીમાં બેબીમેટલ અને પોલીફિયાનું ‘સનસેટ કિસ’, બિનીનું ‘અનંગ કિલિગ’, IVEનું ‘બેંગ બેંગ’, કિકીનું ‘404 (ન્યૂ એરા)’, લિસાનું ‘યસ’ અને SB19નું ‘વિઝા’ નોમિનેટ થયાં છે.
‘જાન સે ગુઝરતે હૈં’ અને ‘કન્હૈયા’ને પણ નિરાશા
ફિલ્મનાં અન્ય બે ગીતો ‘જાન સે ગુઝરતે હૈં’ અને ‘કન્હૈયા’ને બેસ્ટ ગ્લોબલ મ્યુઝિક પર્ફોર્મન્સ કેટેગરીમાં વિચારણા માટે મોકલવામાં આવ્યાં હતાં. પરંતુ આ બંને ગીતો પણ નોમિનેશન મેળવવામાં નિષ્ફળ રહ્યાં. બીજી તરફ, જાસ્મીન સેન્ડલાસ અને સતિન્દર સરતાજના અવાજમાં રજૂ થયેલું ગીત ‘જયે સજના’ બેસ્ટ પોપ ડ્યૂઓ/ગ્રુપ પર્ફોર્મન્સ કેટેગરીમાં સબમિટ કરવામાં આવ્યું હતું. જોકે, આ ગીતને પણ અંતિમ યાદીમાં સ્થાન મળ્યું નથી.
ચાહકોને મોટો ઝટકો, હવે ચર્ચામાં ગ્રેમીનું પરિણામ
‘ધુરંધર’નાં ગીતોએ ફિલ્મની લોકપ્રિયતા વધારવામાં મહત્ત્વની ભૂમિકા ભજવી છે. ફિલ્મનું સંગીત અને તેના ગીતો સોશિયલ મીડિયા પર પણ ચર્ચામાં રહ્યાં હતાં. આટલી લોકપ્રિયતા છતાં ગ્રેમી 2027ની અંતિમ નોમિનેશન યાદીમાં એકપણ ગીત સ્થાન ન મેળવી શકતાં ચાહકોમાં નિરાશા જોવા મળી શકે છે. હવે સવાલ એ છે કે ભારતીય ફિલ્મોના સંગીતને વૈશ્વિક મંચ પર ઓળખ અપાવવાની આશા વચ્ચે ‘ધુરંધર’ના ગીતો ગ્રેમી નોમિનેશનથી કેમ દૂર રહ્યાં? જોકે, એક વાત સ્પષ્ટ છે કે ગ્રેમી નોમિનેશન ન મળવાથી ફિલ્મનાં ગીતોની લોકપ્રિયતા કે ચાહકોનો પ્રેમ ઓછો થતો નથી.