ધુરંધર 2: રણવીર સિંહની ફિલ્મનો ટિકિટ રેકોર્ડ

બોલિવૂડ સુપરસ્ટાર રણવીર સિંહની મોસ્ટ અવેટેડ ફિલ્મ 'ધુરંધર 2' રિલીઝ થવાને હવે ગણતરીના દિવસો બાકી છે, પરંતુ ફિલ્મે અત્યારથી જ રેકોર્ડબ્રેક કમાણીના સંકેતો આપી દીધા છે. મુંબઈમાં આ ફિલ્મના પેઇડ પ્રીવ્યૂ શો માટે ટિકિટના ભાવ આસમાને પહોંચ્યા છે. તાજેતરના અહેવાલો મુજબ, મુંબઈમાં એક ટિકિટ 3100 રૂપિયામાં વેચાઈ છે, જે ભારતીય સિનેમાના ઇતિહાસમાં કોઈપણ નિયમિત ફિલ્મ માટે અત્યાર સુધીની સૌથી વધુ કિંમત છે.

પોપ કલ્ચર ઇવેન્ટ બની 'ધુરંધર 2' : 

આ ફિલ્મ માત્ર એક સિનેમા નથી પરંતુ ભારતીય મનોરંજન જગતની એક મોટી ઈવેન્ટ બની ગઈ છે. 19 માર્ચે થિયેટરોમાં રિલીઝ થનારી આ ફિલ્મ માટે ચાહકોમાં જબરદસ્ત ક્રેઝ જોવા મળી રહ્યો છે. જોકે સંપૂર્ણ એડવાન્સ બુકિંગ હજુ શરૂ થયું નથી, પરંતુ 18 માર્ચના રોજ યોજાનારા સ્પેશિયલ પેઇડ પ્રીવ્યૂ માટે બુકિંગ ખુલતાની સાથે જ ટિકિટો હોટ કેકની જેમ વેચાઈ રહી છે. ટ્રેલરના લોન્ચિંગ બાદ જ આ ફિલ્મે સોશિયલ મીડિયા અને બોક્સ ઓફિસ ચર્ચાઓમાં ધૂમ મચાવી દીધી છે.

મુંબઈના આ થિયેટરમાં વેચાઈ સૌથી મોંઘી ટિકિટ : 

દિલ્હી અને બેંગલુરુ જેવા મેટ્રો શહેરોમાં પ્રીમિયમ થિયેટરોમાં ટિકિટના ભાવ 2500 રૂપિયાની આસપાસ છે. જોકે, મુંબઈના બોરીવલી વિસ્તારમાં આવેલા સ્કાય સિટી મોલના આઇનોક્સ મેગાપ્લેક્સમાં ભાવ તમામ રેકોર્ડ તોડી રહ્યા છે. અહીં INSIGNIA ક્લાસમાં રાત્રિના શો માટે પ્રાઇમ રિક્લાઇનર સીટની કિંમત 3100 રૂપિયા રાખવામાં આવી છે. આશ્ચર્યની વાત એ છે કે આટલી મોંઘી હોવા છતાં રાત્રે 10:15 ના શોની મોટાભાગની ટિકિટો પહેલેથી જ વેચાઈ ચૂકી છે.

પુષ્પા 2 અને અન્ય ફિલ્મોના રેકોર્ડ તૂટ્યા : 

આ પહેલા સૌથી મોંઘી ટિકિટનો રેકોર્ડ અલ્લુ અર્જુનની 'પુષ્પા 2' ના નામે હતો, જેની ટિકિટ મુંબઈમાં 3000 રૂપિયામાં વેચાઈ હતી. આ સિવાય 'ભૂલ ભુલૈયા 3' અને 'સિંઘમ અગેન' જેવી ફિલ્મોએ પણ 2700 રૂપિયા સુધીનો આંકડો સ્પર્શ્યો હતો. પરંતુ રણવીર સિંહની ફિલ્મે 'સુપર બ્લોકબસ્ટર પ્લસ' દર સાથે આ તમામ ફિલ્મોને પાછળ છોડી દીધી છે. ટિકિટના દરો નિયમિત કરતા ઘણા વધારે હોવા છતાં, પ્રેક્ષકોનો ઉત્સાહ જોતા લાગે છે કે ફિલ્મ ઓપનિંગ ડે પર જ અનેક જૂના રેકોર્ડ તોડી નાખશે.