'હાઉસફુલ 5' ઈવેન્ટમાં બેકાબૂ થયેલી ભીડ, અક્ષય કુમારને હાથ જોડીને અપીલ કરવી પડી

પુણે: 'હાઉસફુલ 5' ની ટીમ રવિવારે પુણેના એક મોલમાં ફિલ્મના પ્રમોશન માટે પહોંચી હતી. આ ઈવેન્ટમાં સુપરસ્ટાર અક્ષય કુમાર, નાના પાટેકર, જેકલીન ફર્નાન્ડિસ, નરગિસ ફાખરી, સૌંદર્યા શર્મા, સોનમ બાજવા, ફરદીન ખાન સહિતના કલાકારો હાજર હતા. જોકે, પોતાના મનપસંદ કલાકારોને જોવા માટે ઉમટેલી વિશાળ ભીડ બેકાબૂ બનતા પુણેના એક મોલમાં અફરાતફરી મચી ગઈ હતી.

જેવી ફિલ્મના સ્ટાર ગેસ્ટ પહોંચ્યા, કે તરત જ ભીડે ધક્કામુક્કી શરૂ કરી દીધી, જેના કારણે સ્થિતિ અનિયંત્રિત બની ગઈ અને ભાગદોડ જેવી પરિસ્થિતિનું નિર્માણ થયું. આ ઈવેન્ટની ક્લિપ્સ સોશિયલ મીડિયા પર વાયરલ થઈ રહી છે, જેમાં એક મહિલા રડતી પણ જોવા મળી રહી છે.

અક્ષય કુમારે હાથ જોડીને અપીલ કરી

 વાયરલ થયેલા એક વીડિયોમાં અક્ષય કુમાર ભીડને શાંત કરવા અને વ્યવસ્થા જાળવવા માટે માઈક પરથી અપીલ કરતા જોવા મળે છે. તેઓ જોરથી બૂમ પાડી રહ્યા છે, "ધક્કા-મુક્કી ન કરો, હું આપ સૌને હાથ જોડીને વિનંતી કરું છું. અહીં બાળકો છે, મહિલાઓ છે, ધક્કા-મુક્કી ન કરો." એક અન્ય ક્લિપમાં, સ્ટેજ નજીક એક મહિલા રડી રહી હતી, જેને સિક્યુરિટી ગાર્ડ્સ પાછળ હટવાનું કહી રહ્યા હતા. જેકલીન ફર્નાન્ડિસ તે મહિલાને શાંત કરવા માટે તેના માથા પર હાથ ફેરવતી પણ જોવા મળી હતી.

'હાઉસફુલ 5' આગામી 6 જૂન, 2025 ના રોજ રિલીઝ થવાની છે. ફિલ્મનું ટ્રેલર આવી ચૂક્યું છે અને તેના ગીતો પણ દર્શકોને પસંદ આવી રહ્યા છે. પરંતુ પુણેમાં બનેલી આ ઘટનાએ સુરક્ષા વ્યવસ્થા પર પણ સવાલ ઉભા કર્યા છે.