ફૂટબોલ બાદ હવે ટીવીની દુનિયામાં રોનાલ્ડોની એન્ટ્રી! પહેલી સિરીઝ 'ડે 1s'માં કોણ કોણ આવશે નજરે?

Cristiano Ronaldo News: ક્રિસ્ટિયાનો રોનાલ્ડો હવે ફૂટબોલના મેદાનની બહાર નવી ઇનિંગ શરૂ કરવા જઈ રહ્યા છે. વિશ્વના દિગ્ગજ ફૂટબોલર રોનાલ્ડોએ પોતાની પહેલી ટીવી સિરીઝ 'ડે 1s'ની જાહેરાત કરી છે. ખાસ વાત એ છે કે આ સિરીઝમાં ફૂટબોલની દુનિયાની ઝલક પણ જોવા મળશે. રોનાલ્ડોએ સોશિયલ મીડિયા પર શૂટિંગ શરૂ થયાની જાણકારી આપતાં મનોરંજન જગતમાં પણ ઉત્સુકતા વધારી દીધી છે.

ક્રિસ્ટિયાનો રોનાલ્ડોની પહેલી ટીવી સિરીઝ 'ડે 1s'નું શૂટિંગ શરૂ
ક્રિસ્ટિયાનો રોનાલ્ડોએ પોતાના ઇન્સ્ટાગ્રામ એકાઉન્ટ પર બ્રિટિશ ફિલ્મ નિર્માતા અને દિગ્દર્શક મેથ્યુ વોન સાથેનો ફોટો શેર કર્યો હતો. આ સાથે તેમણે પોતાની પહેલી ટીવી સિરીઝ 'ડે 1s'નું શૂટિંગ શરૂ થઈ ગયું હોવાની જાહેરાત કરી હતી. રોનાલ્ડોએ પોસ્ટમાં લખ્યું હતું કે તેમની પહેલી ટીવી સિરીઝનું શૂટિંગ શરૂ થઈ ગયું છે અને તેઓ ટૂંક સમયમાં આ પ્રોજેક્ટ વિશે વધુ માહિતી શેર કરશે. રોનાલ્ડોની આ જાહેરાત બાદ તેમના ચાહકોમાં સિરીઝની વાર્તા, કલાકારો અને રિલીઝ ડેટને લઈને ઉત્સુકતા જોવા મળી રહી છે.

શું હશે 'ડે 1s'ની વાર્તા? ફૂટબોલ સાથે જોડાયેલી છે કહાની
અહેવાલો અનુસાર, 'ડે 1s'નું નિર્માણ ક્રિસ્ટિયાનો રોનાલ્ડો અને મેથ્યુ વોન સંયુક્ત રીતે કરી રહ્યા છે. આ સિરીઝની વાર્તામાં ફૂટબોલ મહત્વપૂર્ણ ભૂમિકા ભજવશે. શોની કહાની સ્ટેનલી ડાલ્ટન નામના બ્રિટિશ એજન્ટની આસપાસ ફરશે, જેનું પાત્ર જાણીતા અભિનેતા ડેમિયન લુઇસ ભજવશે. આ સિરીઝમાં ફૂટબોલ જગતના દિગ્ગજ થિએરી હેનરી પણ જોવા મળી શકે છે. આ ઉપરાંત રોનાલ્ડો પોતે અને બ્રિટિશ રેપર ડેવ પણ શોનો ભાગ હશે. ડેવ પોતાના 2019ના ડેબ્યુ આલ્બમ 'સાયકોડ્રામા' માટે જાણીતા છે. શોના પ્રથમ એપિસોડમાં બર્ના બોય, જેમ્સ બ્લેક અને સેન્ટ્રલ સી જેવા કલાકારો પણ જોવા મળશે તેવા અહેવાલો છે. એટલે કે 'ડે 1s'માં ફૂટબોલ, સંગીત અને મનોરંજનનો અનોખો સંગમ જોવા મળી શકે છે.

લંડનમાં ચાલી રહ્યું છે શૂટિંગ, રિલીઝ ડેટની જાહેરાત બાકી
અહેવાલો પ્રમાણે, આ ટીવી સિરીઝનું શૂટિંગ છેલ્લા કેટલાક મહિનાઓથી લંડનમાં ચાલી રહ્યું છે. જોકે, નિર્માતાઓ દ્વારા હજુ સુધી 'ડે 1s'ની સત્તાવાર રિલીઝ ડેટ જાહેર કરવામાં આવી નથી. રોનાલ્ડોએ પણ આગામી સમયમાં પ્રોજેક્ટ વિશે વધુ વિગતો આપવાનો સંકેત આપ્યો છે.

ફૂટબોલના મેદાનથી મનોરંજન જગત સુધી રોનાલ્ડોની નવી ઇનિંગ
41 વર્ષીય ક્રિસ્ટિયાનો રોનાલ્ડો ફૂટબોલના ઇતિહાસના સૌથી સફળ ખેલાડીઓમાંના એક છે. તેમણે પોતાની કારકિર્દીમાં અનેક રેકોર્ડ બનાવ્યા છે. તેમના નામે પ્રોફેશનલ ફૂટબોલમાં 985 ગોલ નોંધાયેલા છે. પોર્ટુગલની રાષ્ટ્રીય ટીમ માટે તેમણે 234 મેચમાં 146 ગોલ કર્યા છે. રોનાલ્ડો હાલમાં સાઉદી અરેબિયાની ક્લબ અલ-નાસર માટે રમી રહ્યા છે. આંતરરાષ્ટ્રીય ફૂટબોલમાંથી નિવૃત્તિ અંગેના અહેવાલો વચ્ચે હવે તેમની ટીવી સિરીઝમાં એન્ટ્રી નવી ચર્ચાનો વિષય બની છે. ફૂટબોલના મેદાન પર પોતાની રમતથી દુનિયાભરમાં ઓળખ બનાવનાર રોનાલ્ડો હવે નિર્માતા તરીકે મનોરંજન જગતમાં પોતાની ઓળખ બનાવવા તૈયાર છે. હવે જોવાનું એ રહેશે કે 'ડે 1s' દ્વારા તેઓ દર્શકોને કેટલી નવી અને રસપ્રદ કહાની આપી શકે છે.