હિન્દી સિનેમાના ખેલાડી કુમાર એટલે કે અક્ષય કુમાર અવારનવાર પોતાની ફિલ્મોની સાથે સાથે પોતાની નાગરિકતાને લઈને પણ ચર્ચામાં રહેતા હોય છે. લાંબા સમય સુધી કેનેડિયન પાસપોર્ટ ધરાવવા બદલ સોશિયલ મીડિયા પર ટીકાઓનો સામનો કરનાર અભિનેતાએ તાજેતરમાં એક કોન્ક્લેવ દરમિયાન આ પાછળના સાચા કારણો અને પોતાની લાગણીઓ વ્યક્ત કરી છે.
જ્યારે કરિયરના સૌથી ખરાબ તબક્કામાંથી પસાર થઈ રહ્યા હતા અક્ષય :&nbsp;
અક્ષય કુમારે જણાવ્યું કે તેમની જિંદગીમાં એક એવો સમય આવ્યો હતો જ્યારે તેમની બે-પાંચ નહીં પણ સતત 16 થી 17 ફિલ્મો બોક્સ ઓફિસ પર નિષ્ફળ સાબિત થઈ હતી. આ નિષ્ફળતાને કારણે તેમને લાગ્યું હતું કે હવે ભારતમાં તેમનું કરિયર પૂરું થઈ ગયું છે. કામના અભાવે તેમણે વિદેશ શિફ્ટ થવાનો અને ત્યાં નાનો-મોટો વ્યવસાય શરૂ કરવાનો મન બનાવી લીધો હતો. આ જ કારણસર તેમણે કેનેડાની નાગરિકતા માટે અરજી કરી હતી અને તેમને ત્યાંનો પાસપોર્ટ મળી ગયો હતો.
કિસ્મતે પલટો માર્યો અને ભારત જ કર્મભૂમિ બની :&nbsp;
કેનેડા જવાની તૈયારીઓ વચ્ચે જ અક્ષય કુમારની બાકી રહેલી ત્રણ ફિલ્મો રિલીઝ થઈ અને આશ્ચર્યજનક રીતે ત્રણેય ફિલ્મો સુપરહિટ રહી. અચાનક મળેલી આ સફળતાને કારણે તેમને ફરીથી ભારતમાં મોટા પ્રોજેક્ટ્સ મળવા લાગ્યા. પરિણામે તેમણે કેનેડા જવાનો વિચાર માંડી વાળ્યો. અક્ષયના મતે, તે સમયે પાસપોર્ટ તેમના માટે માત્ર એક મુસાફરીનો દસ્તાવેજ હતો અને કામની વ્યસ્તતામાં તેઓ તેને બદલાવવાનું ભૂલી ગયા હતા.
ટેક્સ અને દેશભક્તિના મુદ્દે રોષ :&nbsp;
પોતાને 'કેનેડિયન' કહીને ટ્રોલ કરનારા લોકો સામે અક્ષયે દુઃખ વ્યક્ત કર્યું છે. તેમણે સ્પષ્ટતા કરી કે ભલે તેમની પાસે કેનેડાનો પાસપોર્ટ હતો, પરંતુ તેમણે હંમેશા પોતાનો ટેક્સ ભારતમાં જ ભર્યો છે. ભારત સરકારને સૌથી વધુ ટેક્સ ચૂકવનારા અભિનેતાઓમાં તેમનું નામ મોખરે રહે છે. તેમણે ઉમેર્યું કે તેઓ દેશભક્તિ આધારિત ફિલ્મો કોઈ ખાસ છબી બનાવવા માટે નહીં, પરંતુ વિષય પ્રત્યેના લગાવને કારણે કરે છે.
2023માં પુનઃ પ્રાપ્ત કરી ભારતીય નાગરિકતા
વર્ષો સુધી ટ્રોલિંગનો સામનો કર્યા બાદ, અક્ષય કુમારે ભારતની નાગરિકતા માટે ફરી અરજી કરી હતી. વર્ષ 2023માં સ્વતંત્રતા દિવસના અવસરે તેમણે ગર્વ સાથે જાહેર કર્યું હતું કે હવે તેઓ સત્તાવાર રીતે ભારતીય નાગરિક છે અને તેમની પાસે ભારતીય પાસપોર્ટ છે. આ પહેલા નાગરિકતાના અભાવે તેઓ ભારતમાં મતદાનની પ્રક્રિયામાં પણ ભાગ લઈ શકતા ન હતા, જેનો વસવસો હવે દૂર થયો છે.&nbsp;

સતત 16 ફિલ્મો ફ્લોપ જતાં ભારત છોડવાનો કર્યો હતો વિચાર,ભારતીય પાસપોર્ટ મળતા આપી પ્રતિક્રિયા

March 16, 2026 | 13:19 IST