એક્ટ્રેસ ગિરિજા ઓકને મળ્યાં અશ્લીલ મેસેજ

મરાઠી તેમજ હિંદી ફિલ્મો-સિરિયલની જાણીતી અભિનેત્રી ગિરિજા ઓક છેલ્લા કેટલાક દિવસોથી સોશિયલ મીડિયા પર ધૂમ મચાવી રહી છે. તેના વાદળી સાડીમાંના ફોટા અને વીડિયો રાતોરાત વાયરલ થયા બાદ લોકોએ તેને “ભારતની સિડની સ્વીની” અને “નવી નેશનલ ક્રશ” તરીકે નામ આપી દીધું. પરંતુ આ જ પ્રશંસા હવે ઝેર બની ગઈ છે.

ગિરિજાને ઇન્સ્ટાગ્રામ તથા અન્ય પ્લેટફોર્મ પર સેંકડો અશ્લીલ મેસેજ મળી રહ્યા છે. કેટલાક યુઝર્સે તો બેશરમીની તમામ હદો પાર કરી દેતાં સીધા પૂછી લીધું કે, “એક રાતના કેટલા લેશો?” અને “હું તમારા માટે કંઈ પણ કરી શકું છું.”

ગિરિજાએ ખુલ્લેઆમ વાત કરી

એક ઇન્ટરવ્યુમાં ગિરિજાએ કહ્યું: “જ્યારે લોકો મને રૂબરૂ મળે છે ત્યારે ખૂબ આદરથી વાત કરે છે, પ્રેમ આપે છે. પણ સોશિયલ મીડિયા પર એ જ લોકો અશ્લીલ મેસેજ મોકલે છે. આ દુનિયા ખરેખર ખૂબ વિચિત્ર છે.”

તેણે AI-જનરેટેડ ડીપફેક તથા મોર્ફ્ડ ફોટા-વીડિયોની પણ વાત કરી: “મારા મિત્રો, સગાંવહાલાં મને મીમ્સ મોકલે છે, પણ કેટલાક ફોટા એટલા ઘટિયા છે કે હું અસ્વસ્થ થઈ જાઉં છું. તે મને જાતીય વસ્તુ બનજરે રજૂ કરે છે. મારો 12 વર્ષનો દીકરો છે. હજી તે સોશિયલ મીડિયા વાપરતો નથી, પણ એક દિવસ વાપરશે. એને આ બધા નકલી અશ્લીલ ફોટા જોવા મળશે. એ જાણતો હશે કે તે AIથી બનાવેલા છે, પણ તેમ છતાં એ લોકોને સસ્તો રોમાંચ આપે છે. આ વિચાર જ ડરાવે છે.”

સોશિયલ મીડિયા પર બે ભાગમાં વહેંચાયેલાં પ્રતિભાવ

• એક તરફ લોકો ગિરિજાની સુંદરતાના વખાણ કરી રહ્યા છે.
• બીજી તરફ ટ્રોલ્સ અને અશ્લીલ કમેન્ટ કરનારાઓએ માહોલ બગાડી દીધો છે.

આ ઘટનાએ ફરી એક વાર સોશિયલ મીડિયા પર મહિલાઓ સામે થતા સાયબર હેરેસમેન્ટ અને AI દ્વારા બનાવવામાં આવતા ડીપફેકના જોખમ પર ચર્ચા છેડી દીધી છે.

ગિરિજા ઓક હાલ ‘અશોકાવન’, ‘દામિની’, ‘तारीख पे तारीख’ જેવા પ્રોજેક્ટ્સમાં વ્યસ્ત છે અને તેની આવનારી મરાઠી ફિલ્મોની પણ ચર્ચા ચાલી રહી છે.