61 વર્ષની ઉંમરે આમિર ખાન કરશે ત્રીજા લગ્ન!

Aamir Khan And Gauri Spratt Marriage: બોલિવૂડના કોરિડોરમાંથી આ સમયના સૌથી મોટા અને ચોંકાવનારા સમાચાર સામે આવી રહ્યા છે. હિન્દી સિનેમાના 'મિસ્ટર પરફેક્શનિસ્ટ' તરીકે ઓળખાતા અભિનેતા આમિર ખાન ફરી એકવાર વરરાજા બનવા માટે તૈયાર છે. આમિર ખાન અને ગૌરી સ્પ્રેટ લાંબા સમયથી એકબીજાને ડેટ કરી રહ્યા હતા, અને હવે આ દંપતીએ પોતાના સંબંધોને સત્તાવાર નામ આપવાનો એટલે કે લગ્ન કરવાનો મોટો નિર્ણય લીધો છે. બંને પરિવારોની સંમતિથી લગ્નની તારીખ પણ નક્કી કરી લેવામાં આવી છે.

આમિર ખાનના ઘરે જ યોજાશે લગ્ન સમારોહ
અહેવાલો અનુસાર, આમિર ખાન અને ગૌરી સ્પ્રેટ વચ્ચેની નિકટતા હવે લગ્નના મંડપ સુધી પહોંચી ગઈ છે. બંનેએ પરસ્પર સમજણથી પોતાના જીવનનો આ મહત્વપૂર્ણ નિર્ણય લીધો છે. આ હાઈ-પ્રોફાઈલ લગ્ન આગામી 5 જુલાઈએ યોજાવા જઈ રહ્યા છે. સૌથી ખાસ વાત એ છે કે આ લગ્ન માટે કોઈ મોટું બજેટ, વૈભવી હોટેલ કે વિદેશમાં ડેસ્ટિનેશન વેડિંગ પસંદ કરવામાં આવ્યું નથી. આમિર ખાન આ લગ્ન ખૂબ જ સાદગીથી પોતાના ઘરે જ કરવા જઈ રહ્યા છે, જેમાં માત્ર નજીકના મિત્રો અને પરિવારના સભ્યો જ સામેલ થશે.

મીડિયાની નજરથી દૂર એક વર્ષથી લિવ-ઈનમાં રહે છે કપલ
આમિર ખાનના પરિવારના એક નજીકના સૂત્રએ જણાવ્યું કે, આમિર અને ગૌરી છેલ્લા એક વર્ષથી વધુ સમયથી એક પરિવાર તરીકે સાથે રહી રહ્યા છે. છેલ્લા કેટલાક મહિનાઓથી મીડિયા અને લાઈમલાઈટથી દૂર રહીને તેમણે ખૂબ જ ખુશ, શાંતિપૂર્ણ અને સ્થિર જીવન જીવ્યું છે. તેમની વચ્ચેની કેમેસ્ટ્રી અને અંડરસ્ટેન્ડિંગ ઉત્તમ રહી છે, જેના કારણે હવે તેમણે પરિવારોની હાજરીમાં આ સુંદર યાત્રાને ઔપચારિક લગ્નનું રૂપ આપવાનું નક્કી કર્યું છે. આ લગ્નમાં આમિરના ખાસ મિત્રો સલમાન ખાન અને શાહરૂખ ખાન પણ હાજરી આપે તેવી પ્રબળ શક્યતા છે.

ઉંમરમાં 14 વર્ષનો તફાવત, સંબંધો પર આમિરનો ખુલાસો
આમિર ખાન (61) અને ગૌરી સ્પ્રેટ (46) વચ્ચે 14 વર્ષનો ઉંમરનો તફાવત હોવા છતાં, તેઓ ખૂબ જ મજબૂત બોન્ડિંગ ધરાવે છે. તાજેતરમાં જ એક ઇન્ટરવ્યુમાં આમિરે પોતાના સંબંધો વિશે ખુલ્લેઆમ વાત કરતા સંકેત આપ્યો હતો કે, "ગૌરી અને હું એકબીજા પ્રત્યે ખૂબ જ ગંભીર છીએ અને અમે કમિટેડ રિલેશનશિપમાં છીએ. લગ્નની વાત કરીએ તો, મારા હૃદયમાં હું પહેલાથી જ તેની સાથે પરિણીત છું. તેથી અમે તેને ક્યારે ઔપચારિક બનાવીએ છીએ તે સમય નક્કી કરશે."

આમિર ખાનના જીવનનો ત્રીજો અધ્યાય
જો આ લગ્ન થાય છે, તો તે આમિર ખાનના જીવનના ત્રીજા લગ્ન હશે. આમિરના પહેલા લગ્ન રીના દત્તા સાથે 1986માં થયા હતા, જે 2002માં તૂટ્યા હતા. રીનાથી તેમને બે બાળકો જુનૈદ ખાન અને ઇરા ખાન છે. ત્યારબાદ આમિરે 2005માં ફિલ્મ નિર્માતા કિરણ રાવ સાથે લગ્ન કર્યા હતા, જેનાથી તેમને એક પુત્ર આઝાદ છે. 2021માં કિરણ સાથે પણ તેમના છૂટાછેડા થયા હતા. બીજી તરફ ગૌરી પણ 6 વર્ષના એક પુત્રની માતા છે. હવે આ કપલ એક નવા જીવનની શરૂઆત કરવા જઈ રહ્યું છે.