જાણીતા સિંગર અને રેપર બાદશાહ માટે મુસીબતો વધી રહી છે. હરિયાણવી સંસ્કૃતિને કથિત રીતે નુકસાન પહોંચાડવા બદલ લોરેન્સ બિશ્નોઈ ગેંગે બાદશાહને જાનથી મારી નાખવાની ધમકી આપી છે.
સોશિયલ મીડિયા પર વાયરલ થયેલી એક કથિત પોસ્ટમાં ગેંગના સભ્યોએ બાદશાહને ચેતવણી આપી છે કે હવે પછી તેનો સામનો ગોળીઓથી થશે.
'ટટેરી' ગીત અને વિવાદ
બાદશાહનું નવું હરિયાણવી ટ્રેક 'ટટેરી' તાજેતરમાં રિલીઝ થયું હતું, જેમાં મહિલાઓ અને સગીરો માટે વાંધાજનક શબ્દો અને દ્રશ્યો હોવાનો આક્ષેપ કરવામાં આવ્યો છે. આ મામલે પંચકુલામાં બાદશાહ વિરુદ્ધ કેસ પણ નોંધાયો છે.
જોકે, બાદશાહે ગયા અઠવાડિયે જ આ મામલે માફી માંગતા કહ્યું હતું કે તે પોતે હરિયાણવી છે અને કોઈની લાગણી દુભાવવાનો તેનો ઈરાદો નહોતો.
બિશ્નોઈ ગેંગની ધમકીભરી પોસ્ટ
લોરેન્સ બિશ્નોઈ ગેંગના કથિત સભ્યો રણદીપ મલિક અને અનિલ પંડિતના નામે કરવામાં આવેલી પોસ્ટમાં લખ્યું છે કે, "બાદશાહ, તેં હરિયાણાની સંસ્કૃતિ બગાડવાનો પ્રયાસ કર્યો છે.
2024માં તારા ક્લબ બહાર અમે ટ્રેલર બતાવ્યું હતું, હવે પછી સીધી તારા કપાળમાં ગોળી મારીશું." નોંધનીય છે કે 2024માં ચંદીગઢમાં બાદશાહની ક્લબ 'સેવિલે બાર એન્ડ લાઉન્જ' બહાર વિસ્ફોટ થયો હતો, જેની જવાબદારી ગોલ્ડી બરારે લીધી હતી.
પાણીપત ફાયરિંગની પણ જવાબદારી લીધી
આ જ પોસ્ટમાં ગેંગે પાણીપતના અસંધ રોડ પર આવેલા વેસ્ટર્ન યુનિયન (હવાલા) ઓફિસ પર થયેલા ફાયરિંગની પણ જવાબદારી સ્વીકારી છે.
ગેંગનો દાવો છે કે આ લોકો હવાલા દ્વારા દેશની અર્થવ્યવસ્થાને નુકસાન પહોંચાડી રહ્યા હતા, તેથી તેમને નિશાન બનાવવામાં આવ્યા છે.
હાલમાં પોલીસ આ પોસ્ટની સત્યતાની તપાસ કરી રહી છે અને બાદશાહની સુરક્ષાને લઈને પણ સાવચેતી રાખવામાં આવી રહી છે. સલમાન ખાન બાદ હવે બાદશાહ બિશ્નોઈ ગેંગના હિટલિસ્ટમાં આવતા બોલિવૂડ અને મ્યુઝિક ઈન્ડસ્ટ્રીમાં ફફડાટ ફેલાયો છે.

બાદશાહને મળી ધમકી

'ટટેરી' ગીતમાં વાંધાજનક શબ્દો બદલ બિશ્નોઈ ગેંગે બાદશાહને નિશાન બનાવ્યો, પોસ્ટ દ્વારા ધમકી

March 15, 2026 | 11:43 IST