PM મોદીનો પટનામાં રોડ-શો, RJD-કોંગ્રેસ પર પ્રહાર

વડાપ્રધાન નરેન્દ્ર મોદીએ રવિવારે બિહારના પટનામાં એક ભવ્ય રોડ-શોનું આયોજન કર્યું હતું, જેમાં મુખ્યમંત્રી નીતિશ કુમાર હાજર ન હતા. દિનકર ચોકથી શરૂ થયેલો અને ઉદ્યોગ ભવન ખાતે સમાપ્ત થયેલો આ 2.8 કિલોમીટર લાંબો રોડ-શો અંદાજે 40 મિનિટ સુધી ચાલ્યો હતો. ફૂલોથી શણગારેલી ગાડીમાં સવાર PM મોદીએ પક્ષના પ્રતીક કમળના ફૂલને હાથમાં પકડીને હાથ જોડીને લોકોનું ઉષ્માભર્યું અભિવાદન ઝીલ્યું હતું. માથું ઝુકાવીને તેમણે જનતાના પ્રેમનો સ્વીકાર કર્યો હતો. આ રોડ-શો દરમિયાન મોદી ઝિંદાબાદના નારા લાગ્યા હતા અને અનેક સ્થળોએ ફૂલોની વર્ષાથી તેમનું સ્વાગત કરવામાં આવ્યું હતું.

ઘરની બાલ્કનીમાંથી PMની આરતી ઉતારી

કેટલાક લોકોએ તો પોતાના ઘરની બાલ્કનીમાંથી PM મોદીની આરતી પણ ઉતારી હતી, જે જનતાના ઉત્સાહને દર્શાવે છે. કેન્દ્રીય મંત્રી લલ્લન સિંહ, સાંસદ રવિશંકર પ્રસાદ, ભાજપ પ્રદેશ પ્રમુખ, મંત્રી નીતિન નવીન, દાનાપુરના ઉમેદવાર રામકૃપાલ યાદવ અને સંજીવ ચૌરસિયા સહિતના નેતાઓ PM મોદી સાથે ઉપસ્થિત રહ્યા હતા. આ રોડ-શો દ્વારા પટનાના 14 વિધાનસભા મતવિસ્તારોને લક્ષ્ય બનાવવાનો સ્પષ્ટ પ્રયાસ હતો. રોડ-શો બાદ PM મોદીએ તખ્ત શ્રી હરિમંદિર સાહિબ ગુરુદ્વારામાં દર્શન કર્યા અને ત્યારબાદ રાજભવનમાં NDA નેતાઓ સાથે ડિનરનું આયોજન કર્યું હતું.

PM મોદીએ આરામાં એક રેલીને સંબોધિ

પટનાના રોડ-શો પહેલાં, PM મોદીએ આરામાં એક રેલીને પણ સંબોધિત કરી હતી, જ્યાં તેમણે વિપક્ષ પર આકરા પ્રહારો કર્યા હતા. તેમણે બિહારમાં 'જંગલ રાજ'ની સંભાવના અને ભ્રષ્ટાચાર પર ધ્યાન કેન્દ્રિત કર્યું. તેમણે કહ્યું કે, બિહારના લોકોનું ગણિત અને સામાન્ય જ્ઞાન સારું છે અને 'ઘાસચારા કૌભાંડ'ના ગુનેગારો લોકોને છેતરી શકશે નહિ. તેમણે 2 પરિવારો પર પ્રહાર કર્યા હતા. એક બિહારનો સૌથી ભ્રષ્ટ પરિવાર (RJD) અને બીજો દેશનો સૌથી ભ્રષ્ટ પરિવાર (કોંગ્રેસ).

આ પણ વાંચો: બિહાર ચૂંટણી: NDAનું 'સંકલ્પ પત્ર' જાહેર

RJD અને કોંગ્રેસ વચ્ચે આંતરિક સંઘર્ષ

PM મોદીએ મહાગઠબંધનમાં તિરાડ તરફ ઈશારો કરતા કહ્યું કે, 'જંગલ રાજના રાજકુમાર'ને કોંગ્રેસના 'યુવરાજ'ની યાત્રાએ 'ચાલતા' કરી દીધા છે. તેમણે દાવો કર્યો કે, કોંગ્રેસે મુખ્યમંત્રી પદ માટે સંમત થવાનો ઇનકાર કર્યા બાદ RJDએ કોંગ્રેસની 'કાનપટ્ટી પર બંદૂક રાખીને' મુખ્યમંત્રી પદ છીનવી લીધું હતું, જે બન્ને પક્ષો વચ્ચેના આંતરિક સંઘર્ષને દર્શાવે છે. PM મોદીએ આક્ષેપ કર્યો કે, RJD અને કોંગ્રેસની ઓળખ 'ક્રૂરતા' છે અને જ્યાં તેમનું કુશાસન હોય છે, ત્યાં કાયદો નિષ્ફળ જાય છે, સામાજિક સંવાદિતા મુશ્કેલ છે અને વિકાસનો કોઈ સંકેત નથી.

NDAનો મેનિફેસ્ટો 'વિકસિત બિહાર' માટે પ્રતિબદ્ધ

PM મોદીએ સ્પષ્ટપણે જણાવ્યું હતું કે, વિકસિત ભારત માટે બિહારનો વિકાસ થવો અનિવાર્ય છે અને RJD-કોંગ્રેસ બિહારને વિકસિત બનાવી શકશે નહિ. તેમણે બિહારમાં 'જંગલ રાજ' પાછું ન આવે તે માટે ફરી એકવાર NDA સરકાર લાવવાની હાકલ કરી. PM મોદીએ કહ્યું કે, NDAનો મેનિફેસ્ટો 'વિકસિત બિહાર' માટે પ્રતિબદ્ધ છે, જેમાં ઔદ્યોગિક વિકાસ અને યુવાનો માટે રોજગારનો સમાવેશ થાય છે. તેમણે બિહારના યુવાનો માટે આગામી વર્ષોમાં 1 કરોડ નોકરીઓ પૂરી પાડવાની પ્રતિબદ્ધતા વ્યક્ત કરી અને બિહારને 'મેડ ઈન ઈન્ડિયા'નું કેન્દ્ર બનાવવાનું લક્ષ્ય રાખ્યું.

ભ્રષ્ટાચારના મુદ્દે RJD-કોંગ્રેસ ગઠબંધનને ઘેર્યું

તેમણે કહ્યું કે, આ વખતે બિહારના લોકો NDAને રેકોર્ડ બેઠકો આપવા જઈ રહ્યા છે. પોતાના સંબોધનમાં, PM મોદીએ 1984ના શીખ નરસંહારના ગુનેગારોને કોંગ્રેસ દ્વારા સન્માન આપવા બદલ તેની ટીકા કરી હતી અને RJD-કોંગ્રેસ દ્વારા છઠ્ઠ પૂજાના અપમાનનો મુદ્દો પણ ઉઠાવ્યો હતો. તેમણે મહિલા સશક્તિકરણ માટે નરેન્દ્ર-નીતીશની પ્રતિબદ્ધતા પર ભાર મૂક્યો, જેમ કે બહેનોના નામે મકાનો આપવા અને 10,000ની આર્થિક સહાય પૂરી પાડવી. તેમણે ભ્રષ્ટાચારના મુદ્દે RJD-કોંગ્રેસ ગઠબંધનને ઘેર્યું અને કહ્યું કે, જમીન હડપ કરનારા, રેલવે લૂંટનારા કે ભ્રષ્ટાચારનો રેકોર્ડ તોડનારા લોકો બિહારનો વિકાસ કરી શકશે નહિ.