બિહારમાં મતદાર યાદી ચકાસણી દરમિયાન મોટી સંખ્યામાં વિદેશી નાગરિકો ઝડપાયા

બિહારમાં ભારતીય ચૂંટણી પંચના સ્થાનિક અધિકારીઓએ દાવો કર્યો છે કે રાજ્યમાં ચાલી રહેલી ખાસ સઘન સમીક્ષા હેઠળ મતદારોની યાદી ચકાસવા માટે ઘરે-ઘરે જઈને ત્રણ પડોશી દેશો- નેપાળ, મ્યાનમાર અને બાંગ્લાદેશના મોટી સંખ્યામાં લોકો મળ્યા છે.

ક્ષેત્ર અધિકારીઓએ જણાવ્યું કે ગેરકાયદેસર સ્થળાંતર કરનારાઓના નામ 30 સપ્ટેમ્બરના રોજ પ્રકાશિત થનારી અંતિમ મતદાર યાદીમાંથી દૂર કરવામાં આવશે, જે યોગ્ય તપાસ બાદ 1 ઓગસ્ટથી શરૂ થશે. ગ્રાઉન્ડ રિપોર્ટ્સનો ઉલ્લેખ કરીને ચૂંટણી પંચના અધિકારીઓએ જણાવ્યું કે ઘરે ઘરે મુલાકાત દરમિયાન બૂથ-લેવલ-અધિકારીઓને નેપાળ, બાંગ્લાદેશ અને મ્યાનમારના "મોટી સંખ્યામાં" લોકો મળી આવ્યા છે.

અત્યાર સુધી 80%થી વધુ મતદારોએ પોતાના વિશે જરૂરી જાણકારી જેવી કે નામ, સરનામું, જન્મ તારીખ, આધાર નંબર, મતદાર કાર્ડ નંબર સહિતની માહિતી દાખલ કરી ફોર્મ જમા કરાવી દીધા છે. આયોગે આ કામ માટેની છેલ્લી તારીખ 25 જુલાઈ નક્કી કરી છે. પરંતુ સમય મર્યાદા પહેલાં જ આ કામ પૂરૂ થઈ જવાની સંભાવના છે. ચૂંટણી પંચ આખરે સમગ્ર ભારતમાં મતદાર યાદીઓનું ખાસ સઘન સંશોધન કરશે જેથી વિદેશી ગેરકાયદેસર સ્થળાંતર કરનારાઓના જન્મસ્થળની તપાસ કરીને તેમને દૂર કરી શકાય.

બિહારમાં આ વર્ષે ચૂંટણી યોજાવાની છે, જ્યારે આસામ, કેરળ, પુડુચેરી, તમિલનાડુ અને પશ્ચિમ બંગાળ જેવા પાંચ રાજ્યોમાં વિધાનસભાની ચૂંટણીઓ 2026માં યોજાવાની છે.